ՖԻԶԻԿԱԿԱՆ ՊԱՏՐԱՍՏՎԱԾՈՒԹՅՈՒՆԸ՝ ԲԱՐՁՐ ՄԱՐՏՈՒՆԱԿՈՒԹՅԱՆ ԳՐԱՎԱԿԱՆ
Զինված ուժերում ծառայությունը և բանակի առօրյան ինքնին նպաստում են առողջ ապրելակերպին:
Ֆիզիկական պատրաստվածությունը, ըստ էության, զինվորական անձնակազմի կյանքի և մասնագիտական գործունեության անբաժանելի մասն է: Զինված ուժերում ծառայությունը կառուցված է զինվորների մեջ մարդկային ու բարոյական բարձր որակների ձևավորման, խիզախության, տոկունության, հայրենիքի հանդեպ պարտքը կատարելու գիտակցության հենքի վրա: Մարտական և մարտավարական տարբեր առաջադրանքների ընթացքում մարդը ծախսում է իր կենսաբանական և ֆիզիոլոգիական ռեսուրսը, որն սպառվում է անհավանական արագությամբ։ Այդ պատճառով զինծառայողները պետք է մշտապես զարգացնեն ու կատարելագործեն իրենց ֆիզիկական պատրաստվածության աստիճանը՝ այն հասցնելով առավելագույնի։
Պատերազմների փորձը ցույց է տալիս, որ անձնակազմի ֆիզիկական պատրաստվածությունը դրական է ազդում մարտունակության, մասնագիտական գործունեության արդյունավետության բազմաթիվ ցուցանիշների վրա։ Օրինակ՝ մոտոհրաձգային ստորաբաժանման ֆիզիկապես լավ պատրաստված զինծառայողները մարտի դաշտում մանևրում են ավելի արագ և մարտական խնդրի կատարման հավանականությունը բարձրացնում են ավելին քան 20%-ով, իսկ հաշվի առնելով սթրեսի գործոնը` այս ցուցանիշը կտրուկ աճում է հասնելով 35% և ավելի։
Ֆիզիկական պատրաստվածությունը պլանավորվում և իրականացվում է հետևյալ ձևերով՝ ուսումնական պարապմունքներ, առավոտյան մարզանք, սպորտային միջոցառումներ, ֆիզիկական պատրաստություն՝ ուսումնամարտական գործունեության ընթացքում և ինքնուրույն ֆիզիկական պատրաստություն։
ԳԵՎՈՐԳ ԳԵՎՈՐԳՅԱՆ
մայոր
Խորագիր՝ #04 (1469) 01.02.2023 - 07.02.2023, Ազգային բանակ, Ուշադրության կենտրոնում
