ՍԻՐՈՒՄ ԵՄ ՆԿԱՐԵԼ

Շարքային Արտյոմ Գոգինյանը նկարել շատ է սիրում: Նկարում է արդեն 11 տարի, սկզբում ինքնուս, հետո ստացել է մասնագիտական կրթություն: Արտյոմը  հիմնականում դիմանկարներ է անում:

-Ես արվեստի մարդ եմ, նաև նվագում եմ, փորձել եմ դերասանական գործը: Ապրում եմ արվեստով և չեմ պատկերացնում օրս առանց գեղեցիկի: Ես ներդաշնակ եմ արվեստի հետ: Նկարելիս հոգիս հուզվում, խռովվում է, միևնույն ժամանակ՝ խաղաղվում,- ասում է Արտյոմը: -Հատկապես զորամասում նկարելն ինձ շատ է օգնել հոգեբանորեն հաղթահարել դժվարությունները: Մինչ զորակոչվելն ունեցած պատկերացումներս բանակի մասին այնքան էլ դրական չէին, բայց ծառայությունն իմ կյանքում շատ բան փոխեց: Հիմա եմ հասկանում, որ բանակը կոփում, ուժեղացնում է տղային, նրան դարձնում իսկական տղամարդ: Մտավախություն ունեի, թե հնարավորություն չեմ ունենալու երկու տարի զբաղվելու սիրածս գործով, սակայն զորամասում զինվորական կարգուկանին զուգահեռ գնահատում են նաև արվեստը: Ինձ ստեղծագործելու հնարավորություն են տվել, ոգեշնչել:

Նկարներս իմ ներաշխարհի յուրովի արտացոլումն են: Բազմաթիվ նոր մտահղացումներ ունեմ, տղաներն էլ մեծ ոգևորությամբ սպասում են իմ նոր գործերին: Ես ուզում եմ, որ նրանցից յուրաքանչյուրը նորովի զգա գեղեցիկը՝ իմ ընկալմամբ:

ՍՅՈՒԶԱՆՆԱ ՎԵՐՄԻՇՅԱՆ