ԱՅՑԵԼՈՒԹՅՈՒՆ ԶԻՆՎՈՐԱԿԱՆ ՍՏՈՐԱԲԱԺԱՆՈՒՄՆԵՐ

Հայոց բանակի օրվա առթիվ Արագածոտնի մարզպետ Սարգիս Սահակյանը նախօրեին այցելեց մարզի տարածքում տեղակայված հակաօդային պաշպանության զորքերի ստորաբաժանումներ, ուր մարզի ղեկավարին դիմավորեցին զինվորական ողջույններով:
Ողջունելով ու շնորհավորելով զինվորներին ու սպայական անձնակազմին Հայոց բանակի ստեղծման 19-ամյակի կապակցությամբ` մարզպետն ընդգծեց Հայոց բանակի զինվորի ու սպայի հանդեպ բացառիկ ուշադրությունն ու հոգատարությունը, որ դրսեւորվում է երկրի ղեկավարության, գերագույն գլխավոր հրամանատարի եւ ընդհանուր ազգաբնակչության կողմից:
-Դուք` հայ ժողովրդի զավակներդ, հաղթանակած բանակի զինվորներ եք, այն բանակի, որին դարեր շարունակ երազել է հայ մարդը: Խորհրդածելու առիթ է տալիս… հայ ժողովրդի հազարամյակների պատմություն եւ` 19 տարեկան հայոց բանակ… Հպարտ եղեք, միշտ զգոն, պատրաստ ոչնչացնելու մեր պետության սահմանը ոտնակոխ անողին: Հիշեք իմաստուն խոսքը. «Երկրի սահմանները զինվորն է գծում»:
Պրն. Սահակյանը ծառայության ընթացքում առավել աչքի ընկած մի խումբ զինվորների ու սպաների հանձնեց Արագածոտնի մարզպետի պատվոգրեր: Այնուհետեւ նրա առաջարկությամբ անձնակազմերի հետ զրույցը շարունակվում էր «ավելի մոտիկից»` լսարանում:
Համառոտ ներկայացնելով մարզի պատկերը` սոցիալ-տնտեսական խնդիրները` պրն. Սահակյանը վկայեց այն դրական տեղաշարժերը, որոնք նկատելի են վերջին տարիներին եւ առավել չափով շարունակվում են ներկայումս, ընդգծելով` հզոր բանակի հիմքը հզոր տնտեսությունն է: Անկեղծ զրույցի ընթացքում մարզպետը պատրաստակամություն հայտնեց իր եւ մարզի ղեկավարության հնարավոր օգնությունն ու աջակցությունը ստորաբաժանումների զինվորների ու սպաների` մարզում բնակվող ընտանիքներին:
-Զինվոր, սպա, թե պետական պաշտոնյա կամ հասարակ աշխատող, առաջին հերթին պետք է կարեւորենք մարդկային հարաբերությունները, փոխադարձ վստահությունն ու հարգանքը, պատասխանատվությունը քեզ վստահված գործին: Ամուր կոլեկտիվ, որի ամեն մի անդամ իրեն պետք է զգա ընդհանուրի մի մասը, որը ոչինչ չի խնայում ընդհանուրի շահի համար: Այս որակները անզեն աչքով տեսանելի են: Դրա վկայությունը նաեւ ձեր իսկ ձեռքով ստեղծած հիանալի պայմաններն են, անչափ ջերմ միջավայրը, որոնք ապահովում են ստորաբաժանման առջեւ դրված անչափ պատասխանատու առաջադրանքների գերազանց կատարումը: Ես հիացմունք ապրեցի, տեղեկանալով, որ ստեղծման օրից մինչ հիմա, մեր մարզի տարածքում տեղակայված ձեր ստորաբաժանումներում արտասովոր ոչ մի դեպք չի գրանցվել: Անկասկած, այդ ամենը առաջին հերթին ստորաբաժանումների հրամանատարների ջանքերի արդյունքն են: Կրկին շնորհավոր ձեր տոնը, որը մեր ընդհանուրի տոնն է նաեւ:
Մարզպետը ստորաբաժանումներին հանձնեց հեռուստացույց եւ DVD: Շնորհակալությամբ ընդունելով նվերը` հրամանատարներն անչափ կարեւորեցին այն հանգամանքը, որ մարզի ղեկավարը Հայոց բանակի հիշարժան բոլոր օրերին իրենց այցելելուց զատ, մշտական կապի մեջ է իրենց հետ, որն իրենց ավելի է պարտավորեցնում ոչ միայն որպես զինվորականի, այլեւ` Հայաստանի Հանրապետության քաղաքացու:

Ա. ԱՎԱԳՅԱՆ