ԱՆԱՉԱՌ ԻՆՔՆԱԳՆԱՀԱՏԱԿԱՆ

Անցյալ տարեվերջին գեներալ-մայոր Կամո Աղաջանյանի հրամանատարությամբ գործող բանակային զորամիավորումում տեղի ունեցավ 2012թ. ուսումնական տարվա մարտական պատրաստության, մարտական պատրաստականության, զինվորական կարգապահության և զորքերի ծառայության արդյունքների ամփոփում: Միջոցառմանը մասնակցեցին զորամիավորման հրամանատարությունը, զորամասերի և ստորաբաժանումների հրամանատարներ, զորամիավորման վարչակազմը: Գեներալ-մայոր Կամո Աղաջանյանի բացման խոսքից հետո զորամիավորման շտաբի պետ գնդապետ Տիգրան Փարվանյանը զեկուցեց 2012թ. ուսումնական տարվա ընթացքում անձնակազմի շրջանում հրամանատարաշտաբային պարապմունքների, սպաների ունակությունների և հմտությունների կատարելագործման, պահակային ծառայության, զենքի ու զինամթերքի պահպանության, կատարողական կարգապահության, անվտանգության կանոնների խստիվ պահպանման, պարբերաբար անցկացված ստուգումների և դրանց արդյունքների մասին: Ներկայացնելով լավագույն ստորաբաժանումներն ու զինծառայողներին՝ շտաբի պետը զորամիավորման և ենթակա զորամասերի մարտական պատրաստականությունն ու զինվորական կարգապահությունը, ընդհանուր առմամբ, գնահատեց «բավարար»:

Զորամիավորման հրամանատարի տեղակալ գնդապետ Նորայր Ամիրխանյանն իր զեկույցում կարևորեց ցուցադրական մարտավարական զորավարժությունների, մարտական պատրաստականության ընթացքում անցկացված ստուգումների, հրամանատարական և ճամբարային հավաքների, գործնական հրաձգության, անձնակազմերի շրջանում անցկացված ստուգարքների, ենթակա զորամասերի ներդաշնակումների, ֆիզիկական պատրաստության, անհրաժեշտ նյութատեխնիկական բազայի, մեքենավարման տեխնիկայի կատարելագործման, ներզորամասային մրցումների դրական անդրադարձը, ինչի շնորհիվ արձանագրված լավագույն ցուցանիշներով զորամիավորումը զբաղեցրել է առաջին տեղը և խրախուսվել ՊՆ ղեկավարության կողմից:

Լավագույն ճանաչված զորամասերը, ստորաբաժանումները և զինծառայողները խրախուսվեցին թանկարժեք նվերներով և դրամական պարգևներով:

ՍՈՒՍԱՆՆԱ ԲԱԲԱՋԱՆՅԱՆ