ԱՐԱՐԱՏՅԱՆ ՔԱՅԼԵՐԳ

Հանուն մեր երկրի, հանուն հավատքի,

Հանուն այսօրվա, հանուն գալիքի,

Հարթելու համար ճամփան հավերժի

Հանուն մեր սիրո ելել ենք երթի:

Խլված պատմության խեղված ընթացքի

Ու մեր գողացված երազանքների,

Մեր ամեն օրվա տերը լինելու…

Սա նաեւ երթն է մեր կայացումի:

Մեր ուժը հողի ծալքից է գալիս,

Խաչված վարքերի ճաքից է գալիս,

Մեծ հաղթանակի անհուն տենչանքի

Եվ ճշմարտության լույսից է գալիս:

Մենք երկրի աղն ենք ու դարի շունչը,

Մենք ենք մեր վաղվա ամուր կամուրջը,

Ու մեր ապագան այսօր է կերտվում,

Եվ ժամանակն է շաչում մեր շուրջը:

Խրոխտ մեր երթին կարոտով անանց

Արձագանքում են դարերը անցած,

Արձագանքում են լեռներն հայրենյաց

Մեր նախնյաց կոչը. «Օն, անդր առաջ»:

Մեզ պատգամվել է ապրել, մարտնչել

Սուրբ ազատության սուրն առաջ պարզած

Մեր շարքերը կուռ ու կամքն ամրացած,

Մեր երթն արդար է, մեզ հետ է Աստված:

ԳՐԻԳՈՐ ՍԱՐԻԲԵԿՅԱՆ
ազատամարտիկ