ՓԱՌԱԲԱՆՈՒՄԻ ՕՐ ԲԵՐՁՈՐՈՒՄ
Բերձորի Արցախյան գոյամարտում զոհված քաջորդիների հուշահամալիրում Մայիսյան եռատոնի միջոցառմանը մասնակցեցին շրջվարչակազմի, քաղաքում գործող ձեռնարկությունների, ուժային կառույցների աշխատակիցները, ղեկավարները, ինչպես նաև դպրոցների, գիշերօթիկ հաստատության ուսուցիչներն իրենց սաներով, բնակիչներ, հյուրեր: Հուշակոթողի երեք խոնարհված պատերին, որոնց վրա Քաշաթաղի տարածքում նահատակված բոլոր քաջորդիների անուններն են փորագրված, ծաղիկներ դրվեցին: Շրջվարչակազմի աշխատակազմի մշակույթի և երիտասարդության հարցերի բաժնի վարիչ Հարութ Ավանեսյանը հայտարարեց հանդիսավոր մասի բացումը: Հնչում է Արցախի օրհներգը, այնուհետև հայտարարվում է լռության րոպե: Աշխատակազմի ղեկավար Դավիթ Դավթյանն իր շնորհավորական խոսքում նշեց, որ մայիսը վերջին հարյուրամյակի ընթացքում հայ ժողովրդի համար դարձել է հաղթանակների ամիս: Անդրադառնալով Քաշաթաղի շրջանի դերին՝ նա ասաց. «Այն սկզբում կապող օղակ էր Հայաստանի և Արցախի միջև, իսկ այնուհետև, վերաբնակեցվելով և կամաց-կամաց կառուցվելով, դարձավ հայրենիք շատ ու շատ փախստականների, սփյուռքահայերի և մեզ համար, ինչպես նաև ծննդավայր մեր երեխաների համար»: Քաշաթաղի զինկոմի տեղակալ, կապիտան Ստեփան Օհանջանյանն անդրադարձավ Շուշիի ազատագրման մարտերի պատմությանը: Ողջույնի խոսք ասաց ՀՀ Երկրապահ կամավորականների միության Քաշաթաղի տարածքային բաժանմունքի նախագահ Սեյրան Ստեփանյանը: Նա կարևորեց այն փաստը, որ Շուշիի ազատագրումից հետո ավելի համախմբվեցին մեր մարտական ջոկատները, և ստեղծվեց հայոց հզոր բանակը: Միջոցառման ընթացքում ասմունքով ելույթ ունեցան մաև Քարեգահի միջնակարգ դպրոցի սաները:
Շրջվարչակազմի ղեկավար Սուրեն Խաչատրյանի կարգադրությամբ 10 ազատամարտիկ և մեկ զոհվածի այրի արժանացան պատվոգրի և դրամական պարգևի: Հանդիսավոր մասից հետո երիտասարդները շուրջպար բռնեցին, որից հետո փուչիկների փունջը ձեռքում պահած փոքրիկ Մարիամը հրապարակում կանգնածների առաջ խոստացավ, որ ինքն ու իր հասակակիցները միշտ կայցելեն հուշահամալիր և կհիշեն բոլոր զոհվածների հերոսական կերպարը և կշարունակեն նրանց կիսատ թողած գործը: Երեկոյան կայացավ տոնական համերգ, իսկ ժամը 22-ին՝ հրավառություն: Նույն օրը Բերձորի արվեստի և սպորտի դպրոցի պարի խմբակի սաները ելույթ ունեցան Շուշիում: Այստեղ էին նաև Քաշաթաղի շրջանի տարբեր համայնքների ղեկավարներ, դպրոցների տնօրեններ, ուսուցիչներ:
ԶՈՀՐԱԲ ԸՌՔՈՅԱՆ
Խորագիր՝ #18 (1036) 15.05.2014 – 21.05.2014, Պատմության էջերից
