Հայ զինվոր

ՄԵԿ ՕՐ ՀՈՎՀ. ԲԱՂՐԱՄՅԱՆԻ ԱՆՎԱՆ ՈՒՍՈՒՄՆԱԿԱՆ ՀՐԱՁԳԱՐԱՆՈՒՄ

Ընթացիկ տարվա ուսումնական պլանի համաձայն՝ Հովհ. Բաղրամյանի անվան զորավարժարանում այս օրերին իրենց գիտելիքներն ու գործնական հմտություններն են կատարելագործում ՀՀ ԶՈՒ տարբեր զորատեսակներ` մոտոհրաձիգներ ու կապավորներ, հրետանավորներ, ՀՕՊ-ի ստորաբաժանումներ ու տանկիստներ:

Մայիսի 26-ին զորավարժարանը վերածվել էր իսկական մարտադաշտի` ավտոմատների անվերջանալի ճարճատյուն, տանկերից ու հրանոթներից արձակված արկերի հզոր պայթյուններ, զենիթային ինքնագնաց կայանների ու ականանետների ականջ խլացնող զարկեր…

Շարքային Սարգիս Ավագյանը աշխատում է կրակի ղեկավարման սարքով: Դիտակետից հաղորդել են նշանակետի հեռավորությունն ու դիրեկցիոն անկյունը: Սարգիսը այդ տվյալները տեղադրելով ղեկավարման սարքի վրա՝ դուրս է բերում նշանակետի ուղղության տեղագրական հեռավորությունն ու շրջաբերը:

Թիվ 2 ուսումնական կետում նշանառու, շարքային Դավիթ Մինասյանը Կալաշնիկովի տանկային գնդացրի «Փամփուշտների լիցքավորում ձեռքով» վարժությունը կատարեց 55 վայրկյանում` արժանանալով գերազանց գնահատականի:

120 մմ ականանետային դիվիզիոնի առաջին ականանետային մարտկոցը հենց նոր ավարտեց մարտական հրաձգությունը: Լուսանկարում շարքայիններ Գրիգոր Շահբազյանն ու Նարեկ Օհանյանն են կապի միջոցները հավաքելիս:

Երկրորդ հաշվարկը` ականանետի հրամանատար, կրտսեր սերժանտ Գևորգ Թորոսյան, նշանառու Գևորգ Ղալիմյան, հաշվարկի համար, շարքային Հարություն Հախվերդյան, վարորդ, շարքային Ժորա Հակոբյան կազմով մարտական հրաձգությունից առաջ ականանետը բերում է մարտական վիճակի:

ՈՒսումնական զորամասի զինվոր, շարքային Արթուր Աղաքարյանը Կալաշնիկովի տանկային գնդացրի «Ոչ լրիվ քանդում» վարժությունը կատարեց 15 վայրկյանում, այսինքն՝ 12 վայրկյանով գերազանցեց սահմանված նորմացույցը, իսկ ահա «Հավաքում» վարժությունը նա կատարեց 30 վայրկյանում և ստացավ «լավ» գնահատական:

Լուսանկարում 57 մմ ավտոմատ զենիթային թնդանոթն է մարտական հրաձգության պահին: Հրաձգությանը մասնակցում են հակաօդային պաշտպանության ԱԶԹ-ի ապագա մասնագետներ Ա. Խանփերյանցի անվան ռազմական ավիացիոն ինստիտուտի կուրսանտներ Վարդան Ադամյանն ու Արա Կարապետյանը:

Զենիթային ինքնագնաց կայանը կոչված է ցածր բարձրություններում թռչող մինչև 2500 մ հեռավորության և 1500 մ բարձրության վրա օդային նշանակետեր, ինչպես նաև մինչև 2000 մ հեռավորության վրա վերգետնյա նշանակետեր ոչնչացնելու համար:
Համաձայն ՀՀ ԶՈՒ ցամաքային ՀՕՊ զորքերի հրաձգության կուրսերի՝ ԶԻԿ-ից մարտական նշանաձգության իր գործնական հմտություններն է կատարելագործում ՀՀ ՊՆ Ա. Խանփերյանցի անվան ռազմական ավիացիոն ինստիտուտի կուրսանտ, ջոկի հրամանատար Դավիթ Սահակյանը: