ՀԵՐԹԱԿԱՆ ԱՅՑԵԼՈՒԹՅՈՒՆ ԼՂՀ ՊԱՇՏՊԱՆՈՒԹՅԱՆ ԲԱՆԱԿ
Հանդիպումը նախարար Լ. Մնացականյանի հետ
Սեպտեմբերի 12-ի երեկոյան տեղի ունեցավ հանդիպում ԼՂՀ պաշտպանության բանակի հրամանատար, գեներալ-լեյտենանտ Լևոն Մնացականյանի հետ: Հանդիպումը ծրագրվածից ավելի ուշ կայացավ, քանի որ հրամանատարը առաջավոր դիրքերում էր:
Գ. Հարությունյանը նախարարին ներկայացրեց այցելության նպատակը՝ զինծառայողներին կարդացվելու են զեկուցումներ՝ նվիրված ՀՀ և ԼՂՀ անկախությանը: Գ. Հարությունյանը կրկին շեշտեց, որ նման դասախոսությունները նպատակ ունեն գործնականում իրականացնելու ու ամրապնդելու բանակ և հասարակություն կապը: Միաժամանակ դասախոսությունները նպատակ ունեն մեկ անգամ ևս զինծառայողների մոտ ամրապնդելու հայրենիքի պաշտպանության անհրաժեշտությունը:
Գեներալ Լ. Մնացականյանը ներկաներին ներկայացրեց իրադրությունը սահմանային շրջաններում և պատասխանեց հետաքրքրող հարցերին:
Սեպտեմբերի 13-ի առավոտյան 9-ին դասախոսական կազմը ԼՂՀ պաշտպանության բանակի շտաբում էր, որտեղից մեկնեցին տարբեր զորամասեր: Մենք՝ Արմենուհի Ղամբարյանը և Ռուբեն Սահակյանը, այցելեցինք ԼՂՀ պաշտպանության բանակի գնդապետ Ա. Չիլինգարյանի հրամանատարությամբ գործող զորամաս: Մեզ ընդունեց հրամանատարի տեղակալ, փոխգնդապետ Արմեն Պետրոսյանը: Փոխգնդապետը ներկայացրեց զորամասի պատմությունը՝ կազմավորվել է 2006 թ. մայիսի 25-ին: Պատմեց ճամբարային հավաքների և ստուգողական պարապմունքների մասին:
«Հայ ասպետ» ակումբի անդամները:
Սեպտեմբերի 14-ին մեզ անակնկալ էր սպասվում: Մեր նախորդ հանդիպման ժամանակ ԼՂՀ նախագահ Բակո Սահակյանը խոստացել էր ցույց տալ Արաքսի հովտում իշխանությունների կողմից իրականացվող աշխատանքները: Վաղ առավոտյան մեկնեցինք Արաքսավան: Այնտեղ էին նախագահ Բ. Սահակյանը և պաշտոնատար այլ անձինք:
Կատարված և նախատեսված աշխատանքները ներկայացրին նախագահ Բ. Սահակյանը և ԼՂՀ փոխվարչապետ Արթուր Աղաբեկյանը:
Ռուբեն ՍԱՀԱԿՅԱՆ
Պատմական գիտությունների դոկտոր
