ԳՐՔԵՐԻ ՑՈՒՑԱԴՐՈՒԹՅՈՒՆ. «ՀԱՅՈՑ ԲԱՆԱԿ»

Հայոց բանակի 24-ամյակի նախօրեին Խաչատուր Աբովյանի անվան հայկական պետական մանկավարժական համալսարանի գիտական գրադարանի հումանիտար գրականության ընթերցասրահում բացվել է հայոց բանակին նվիրված գրքերի ցուցադրություն՝ «Հայոց բանակ» խորագրով: Ցուցադարակներին ներկայացված է վերջին երկուսուկես տասնամյակում տպագրված ավելի քան 180 գիրք ու ամսագիր:

Կենտրոնական ցուցադարակում ներկայացված են Արցախյան շարժման առաջամարտիկներ, Անկախ Հայաստանի պետական-քաղաքական գործիչներ, Հայոց բանակի կազմակերպիչներ, ՀՀ պաշտպանության նախարար, ապա վարչապետ, Հայաստանի և Արցախի Հանրապետությունների Ազգային հերոս Վազգեն Սարգսյանի, Հայաստանի Հանրապետության նախագահ, Արցախի հերոս Ռոբերտ Քոչարյանի, Հայաստանի Հանրապետության պաշտպանության նախարար, վարչապետ, ապա ՀՀ նախագահ, Արցախի հերոս Սերժ Սարգսյանի, ՀՀ պաշտպանության նախարար Վազգեն Մանուկյանի հեղինակած  կամ իրենց մասին պատմող գրքերը:

Առանձին ցուցադարակով ներկայացված են Արցախի պաշտպանության նախարար, Արցախի հերոս, գեներալ-լեյտենանտ Սամվել Բաբայանի «Ազդականչ 44» (հայերեն, ռուսերեն), Հայաստանի Հանրապետության պաշտպանության նախարար, Արցախի հերոս, գեներալ-գնդապետ Սեյրան Օհանյանի «XXI դարի բանակը», «Հայկական բանակի 20-ամյա տարեգրությունը» գրքերը:

Մեկ դարակով ներկայացված են «Ղարաբաղյան ազատագրական պատերազմ, 1988-1994» հանրագիտարանը և հանրագիտարանային արժեք ունեցող Սասուն Գրիգորյանի «Հավերժության լուսամատյան», Գալյա Առստամյանի «ԼՂՀ ազգային ազատագրական պայքար, 1988-2000», Բակուր Կարապետյանի «Արցախյան գոյամարտի համահավաք», Հովհաննես Արմենակյանի «Ես մի զարկն եմ քո կռվի» գրքերը:

Տարբեր տարիների հրատարակությունների շարքը լրացնում են 2015 թ.-ին տպագրված գրքերը, որոնց թվում են Տիգրան Պետրոսյանցի և Գարեգին Ղազարյանի «1100 հայազգի գեներալներ, ծովակալներ» (անգլերեն), Վոլոդյա Հովհաննիսյանի «Սիսական ջոկատ», Երևանի պետական համալսարանի հրատարակած «Թաթուլը» գրքերը:

Առաջին անգամ ներկայացվել է Խաչատուր Աբովյանի անվան հայկական պետական մանկավարժական համալսարանի երաշխավորությամբ հրատարակված պրոֆեսոր Հրանտ Պատրիկյանի «Արյան կանչով» գիրքը, որ ներկայացնում է Արցախյան պատերազմի մասնակից 50 մանկավարժականցիների կենսագրությունը, որոնցից 15-ը հերոսաբար նահատակվել են, այդ թվում՝ Հայաստանի Ազգային հերոս Մովսես Գորգիսյանը, ՀՀ և Արցախի Հանրապետությունների Մարտական Խաչ 1-ին աստիճանի շքանշանների ասպետ Մեխակ Մեխակյանը, ՀՀ և Արցախի Հանրապետությունների Մարտական Խաչ 2-րդ աստիճանի  շքանշանների ասպետ Գևորգ Համբարձումյանը:

Ներկայացված են Ստեփանակերտում տպագրված Սենոր Հասրաթյանի, Մհեր Հարությունյանի, Տարոն Հակոբյանի, Սիրվարդ Մարգարյանի, Վահրամ Աթաջանյանի, Գալյա Առստամյանի մեկ տասնյակից ավելի գրքեր:

Մեծ թիվ են կազմում Արցախյան հերոսամարտին մասնակցած և անմահացած հայորդիներին նվիրված գրքերը: Դրանց թիվն անցնում է հիսունից: Ներկայացված են «Մահապարտներ», Գոհար Մարտիկյանի «Ապրելու բանաձև», Ասպրամ Ծառուկյանի՝ Մոնթե Մելքոնյանին նվիրված գրքերն ու այլ հրատարակություններ:

Ցուցադրությունում տեղ է հատկացվել «Հայոց բանակ» և ՀՀ պաշտպանության նախարարության Վազգեն Սարգսյանի անվան ռազմական ինստիտուտի «Կուրսանտ» հանդեսներին, որոնցում հրապարակված նյութերը պատմում են բանակի անցած ուղու, ներկա խնդիրների մասին:

Ցուցադրությունը խիստ ուսուցողական է և ունի ռազմահայրենասիրական դաստիարակության մեծ ներուժ:

Աննա ՄԱՐՏԻՐՈՍՅԱՆ

ՀՊՄՀ գիտական գրադարանի վարիչ