ՈՒՍՈՒՄՆԱԿԱՆ ԿՐԱԿՈՑՆԵՐԸ ՇԱՐՈՒՆԱԿՎՈՒՄ ԵՆ

Երևանի թիվ 105 ավագ դպրոցում ձևավորված ավանդույթի համաձայն՝ տնօրինության, աշակերտական խորհրդի, երկրապահ կամավորական աշակերտների հետ համատեղ մայրության և գեղեցկության միամսյակի առիթով կազմակերպվեց հրաձգության մրցույթ օդամղիչ  հրացաններից, որին ակտիվորեն մասնակցեցին հինգ տասնյակից ավելի աշակերտուհիներ:

Մինչ հրաձգությունը, իմ կողմից անցկացվեց անվտանգության կանոնները պահպանելու վերաբերյալ համապատասխան հրահանգավորում: Մրցույթն անցավ մեծ հետաքրքրությամբ: Անտարբեր աշակերտ չկար: «Մարտադաշտ» էին մտել աղջիկները: Խանդավառված էին բոլորը՝ ուսուցիչները, աշակերտները և իհարկե` մասնակիցները: Հրաձգության ավարտից հետո մասնակցուհիները բարձր տրամադրությամբ տուն մեկնեցին՝ անհամբեր սպասելով արդյունքներին, որոնք պետք է հայտարարվեին հաջորդը օրը:

Արդյունքները ավելի քան բավարար էին: Մասնակիցներից յուրաքանչյուրը  բարձր միավոր էր հավաքել: Հաղթող ճանաչվեցին ամենադիպուկները:

1-ին մրցանակային տեղը գրավեց 8-րդ դասարանի աշակերտուհի Մարիամ Մանուկյանը: Նա նոր է ավարտել ՀՀ ԵԿՄ «Պատանի երկրապահ» ակումբի սերժանտական դասընթացները: Ունի կրտսեր սերժանտի կոչում:

2-րդ տեղը գրավեց նրա համադասարանցի Վարդուհի Օրդակյանը, իսկ երրորդ տեղը գրավեցին 10-րդ դասարանցի Լաուրա Փարսադանյանը և 12-րդ դասարանցի Լիլիթ Դավթյանը:

Հաղթողներին շնորհավորեց և տնօրինության պատվոգրերով պարգևատրեց դպրոցի տնօրեն Ա. Սողոյանը` մաղթելով նրանց նորանոր հաջողություններ ուսման մեջ և, ինչու չէ, ռազմահայրենասիրական գործում:

Մրցույթի ընթացքում օգնեցին և իրենց տեսական փորձն ու գիտելիքները փոխանցեցին ԵԿՄ պատանի երկրապահները՝ դպրոցի 9-րդ և 10-րդ դասարանի աշակերտներ, կրտսեր սերժանտներ Արթուր Ավդալյանը և Վարդան Դավթյանը:

Մրցությունը մեկ անգամ ևս հնարավորություն տվեց  բացահայտելու գեղեցիկ սեռի կարողությունները, սերը զինվորական գործի նկատմամբ, հայրենիքի պաշտպանության գործին նվիրվածությունը: Համոզվեցինք, որ մեր աղջիկները անհրաժեշտության դեպքում թե՛ հոգեբանորեն և թե՛ ֆիզիկական որակներով լիովին պատրաստ են իրենց զինվոր ավագ եղբայրների կողքին կանգնելու և հայրենիքի պաշտպանության գործում նրանցից ետ չմնալու:

Հ. ՀԱԿՈԲՅԱՆ

Երևանի թիվ 105 ավագ դպրոցի

զինղեկ, փոխգնդապետ