ԱՄԵՐԻԿԱ-ԱԴՐԲԵՋԱՆԱԿԱՆ ՀԱՄԱԳՈՐԾԱԿՑՈՒԹՅՈՒՆԸ` ՀԱՐՎԱԾ ՌՈՒՍԱՍՏԱՆԻ՟Ն

ԱՄՆ-ը և Ադրբեջանը անվտանգության ոլորտում համագործակցության նոր փուլ են սկսում, որը վերաբերում է նախևառաջ Կասպից ծովում էներգետիկ ենթակառուցվածքների պաշտպանությանը: Այս մասին հունիսի 11-ին հայտարարեց Ադրբեջանում ԱՄՆ դեսպան Մեթյու Բրայզան: Ռուսական «Վոյեննոյե օբոզրենիյեն» (www.topwar.ru) այդ համագործակցությունն անվանել է «հարված Ռուսաստանին»:

Բրայզայի հայտարարությունից մի քանի օր առաջ` հունիսի 8-ին, Ադրբեջանում Ռուսաստանի դեսպան Վլադիմիր Դորոխինը հայտարարել էր, որ Մոսկվան դեմ է Կասպից ծովի հատակով խողովակաշարերի կառուցմանը: Այդ հարցում Ռուսաստանին պաշտպանում է Իրանը` մատնանշելով բնապահպանական խնդիրները:

Իսկ ահա Ղազախստանը, Թուրքմենստանը և Ադրբեջանը գտնում են, որ եթե իրենք համաձայնության գան խողովակաշարի հարցում, ապա մերձկասպյան մյուս երկրների կարծիքն էական չէ: Նախագծի համաձայն` Ղազախստան-Թուրքմենստան-Ադրբեջան անդրկասպյան գազամուղը պետք է միանա Բաքու-Թբիլիսի-Էրզրում գազամուղին, որը «Նաբուկո» խողովակաշարի հատվածներից մեկն է: