«ԵՎՐԱՏԵՍԻԼ-2016»-ի ԱՄԵՆԱԳԵՂԵՑԻԿ ԵՐԳՉՈՒՀԻՆ

«Արեցինք լավագույնը՝ Հայաստանի անունը բարձր պահելու համար»։

ԻՎԵՏԱ ՄՈՒԿՈՒՉՅԱՆ

«Եվրատեսիլ-2016» երգի միջազգային մրցույթին Հայաստանը ներկայացրեց երգչուհի Իվետա Մուկուչյանը՝ Love Wave երգով: Նա հայտնվեց լավագույն տասնյակում և զբաղեցրեց 7-րդ հորիզոնականը:

Love Wave երգի երաժշտության համահեղինակները Լևոն և Լիլիթ Նավասարդյաններն են, խոսքերինը՝ Իվետա Մուկուչյանը և Ստեֆանի Քրաթչֆիլդը: Երգի հիմքում երգչուհու ապրումներն են ու զգացմունքները:

«Եվրատեսիլ-2016» երգի միջազգային մրցույթի առաջին կիսաեզրափակչի ժամանակ Իվետան Հայաստանի դրոշի հետ մեկտեղ ցուցադրել է նաև Արցախի դրոշը: Իր քայլը նա այսպես է մեկնաբանել. «Եկեք չմոռանանք, որ ես ներկայացնում եմ իմ երկիրը և այն միշտ պահում եմ իմ սրտում և մտքում: Ուզում եմ ամբողջ աշխարհին տարածել, որ ես միայն խաղաղություն եմ ցանկանում իմ երկրի սահմաններում: Ահա թե ինչու եմ ներկայացնում այս երգը: Դրա միջոցով ցանկանում եմ սիրո ալիքը տարածել ամենուրեք: Ես ծնվել եմ Գերմանիայում, բայց ես հայ եմ և միայն խաղաղություն եմ ցանկանում աշխարհի և Հայաստանի համար»:

Հայ երգչուհին հաղթել է Wiwibloggs  կայքի հայտարարած ամենամյա  Eurovisions Next Top Model մրցույթում, որը քվեարկություններ է կազմակերպում ՝ պարզելու ամենագեղեցիկ երգչուհուն և երգչին: Ըստ կայքում հրապարակված տվյալների՝ Իվետա Մուկուչյանն ստացել է ձայների գերակշիռ մեծամասնությունը և «Եվրատեսիլ-2016» երգի միջազգային մրցույթի ամենագեղեցիկ երգչուհի տիտղոսը:

Իր ֆեյսբուքյան էջում երգչուհին գրառել է. «Շատ գնահատում եմ մարդկանց վերաբերմունքը, ջերմությունը, սերը, խոսքերը, որ ամեն օր լսում եմ: Մարտական հագուստի պես այդ խոսքերը ինձ հետ կրելու եմ բեմում»:

Ապրիլի սկզբին ղարաբաղյան ճակատում լարվածության աճից հետո Իվետան չեղյալ հայտարարեց իր համերգներից մի քանիսը: Երգչուհու խոսքով, այդպիսով նա ուզում էր մրցույթի մասնակից 42 պետությունների ուշադրությունը հրավիրել խնդրի վրա: Դա բողոքի ձայն բարձրացնելու նրա միջոցն էր:

Մրցույթն իսկապես լավ առիթ էր Հայաստանի անունը հնչեցնելու ավելի քան 40 երկրներում, շուրջ 200 մլն հեռուստադիտողների շրջանում: