ՊԱՐԳԵՎԱՏՐՎԵԼ ԵՆ ԲԱԶՄԱԶԳ ԶՈՐԱՎԱՐԺՈՒԹՅԱՆԸ ՄԱՍՆԱԿՑԱԾ ԲՈՒԺԾԱՌԱՅՈՂՆԵՐԸ

Հուլիսի 23-ին ՀՀ ՊՆ վարչական համալիրում պարգևատրվել են մարտի 29-ից ապրիլի 22-ը Գերմանիայի Դաշնային Հանրապետությունում անցկացված «Միաձուլված սուր 2016» բազմազգ զորավարժությանը աչքի ընկած բժիշկները, բուժքույրերը և բուժակները։

Ողջունելով զորավարժության մասնակիցներին` ՀՀ պաշտպանության նախարարի առաջին տեղակալ Դավիթ Տոնոյանը և ՀՀ ԶՈւ գլխավոր շտաբի պետի առաջին տեղակալ Էնրիկո Ապրիամովը շնորհակալություն հայտնեցին բուժծառայողներին զորավարժության ընթացքում ցուցաբերած մասնագիտական բարձր պատրաստվածության, ինչպես նաև առաջադրված խնդիրները ժամանակին և օպերատիվորեն իրականացնելու համար:

Մարտի 29-ից ապրիլի 22-ը ՀՀ ԶՈւ դաշտային շարժական հոսպիտալը ԱՄՆ զինված ուժերի 173-րդ բրիգադի կազմում մասնակցել է ԳԴՀ-ում կայացած «Միաձուլված սուր 2016» միջազգային զորավարժությանը, որի ընթացքում ձևավորված բժշկական վաշտի կազմում ապահովել է 2-րդ մակարդակում անձնակազմի բժշկական սպասարկում։ Զորավարժությանը մասնակցել են մոտ 5000 զինծառայողներ 15 պետություններից։ ՀՀ ԶՈւ դաշտային շարժական հոսպիտալի մասնակցության հիմնական նպատակն էր՝ դաշտային հոսպիտալի տեղափոխման, ծավալման աշխատանքների կազմակերպումը և փորձի փոխանակումը, ինչպես նաև պատերազմական պայմաններին առավելագույնս մոտեցված իրավիճակներում հոսպիտալի ծավալման, վիրավորների և հիվանդների ընդունման, բուժօգնության ցուցաբերման և տարհանման աշխատանքների կազմակերպումը, ՀՀ ԶՈւ դաշտային հոսպիտալի փաստաթղթաշրջանառության համապատասխանեցումը ՆԱՏՕ-ի չափորոշիչներին և այլն։

Զորավարժությանը ներգրավված հրամանատարական կազմի բարձրաստիճան սպաները գոհունակություն հայտնեցին ՀՀ ԶՈւ զորախմբի պատրաստվածության, կազմակերպվածության և փոխգործակցելիության բարձր մակարդակից։