ԻՍՐԱՅԵԼԸ ՀԱՍԵԼ Է ԻՐ ՆՊԱՏԱԿԻՆ
Մի քանի տարի տևած բանակցություններից հետո ԱՄՆ-ը և Իսրայելը համաձայնագիր են ստորագրել, որը թույլ կտա վերջինիս համար նախատեսված ամերիկյան F-35 Lightning II հեռանկարային կործանիչների վրա իսրայելական արտադրության սարքավորումներ և սպառազինություն տեղադրել:
Իսրայելը երկար ժամանակ փորձում էր նման թույլտվություն ստանալ, սակայն ամերիկացիները մերժում էին, քանի որ այդ տարբերակում կպահանջվեր որոշակի փոփոխություններ մտցնել ոչ միայն ինքնաթիռի կառուցվածքում, այլև ծրագրային ապահովման մեջ` տեխնոլոգիաները փոխանցելով իսրայելցի զինվորականներին: Ի վերջո, Իսրայելը հասել է իր ուզածին:
Սեփական արտադրության սարքավորումներ և սպառազինություն տեղադրելու անհրաժեշտությունը նրանք հիմնավորում են նրանով, որ F-35-երի գործարանային համակարգերը չեն կարող մարտական խնդիրներ կատարել մերձավորարևելյան տարածաշրջանի պայմաններում, ի վիճակի չեն դիմակայել սիրիական SA-17 («ԲՈՒԿ-Մ2») և SA-22 («Պանցիր-Ս1») զենիթահրթիռային համակարգերին:
Կործանիչների գնումը չափազանց կարևոր է Իսրայելի համար, քանի որ ինքնաթիռներից շատերը արդեն հին են և առաջիկա տարիներին դուրս են գրվելու` օդուժում առաջացնելով մարտական ինքնաթիռների պակաս:
Խորագիր՝ Նորություններ, Ռազմական
