ՇՆՈՐՀԱՎՈՐԱՆՔՆԵՐ

Օրերս լրացավ զորամասի հրամանատարի ԱՀՏԱ գծով տեղակալ, մայոր Օնիկ Պետրոսյանի ծննդյան 30-ամյակը: Արդեն ինը տարի է, ինչ Օնիկ Պետրոսյանը մեր զորամասում է և իր անձնվեր ծառայությամբ ու նվիրվածությամբ, ոգու ամրությամբ օրինակ է հանդիսանում բոլորիս համար: Հայրենասեր զինվորականի նրա կերպարը զորամասում ոգևորում և համախմբում է բոլորիս:

Փոխգնդապետ Ա. Քարտաշյանի հրամանատարությամբ գործող ստորաբաժանման ողջ անձնակազմը սրտանց շնորհավորում է մայոր Օնիկ Պետրոսյանի տարեդարձը: Մաղթում ենք մեր հարգելի ու սիրելի մայորին, որ նրա ուժն ու եռանդը երբեք չպակասի: Եվ թող հայրենիքի ծառայության գործում հաջողությունը մշտապես ուղեկցի նրան:

***

«Հայ զինվոր» պաշտոնաթերթի միջոցով ուզում եմ ջերմորեն շնորհավորել սահմանամերձ զորամասերից մեկում ծառայող շարքային Գևորգ Էդուարդի Մելյանին ծննդյան 20-րդ տարեդարձի կապակցությամբ: Շնորհավորանքիս միանում են նաև Գևորգի ծնողները` Էդուարդը, Սվետլանան, եղբայրները` Էդգարը, Սարգիսը, բոլոր հարազատները` մեր զինվորին մաղթելով քաջառողջություն, անսպառ երջանկություն, տոկունություն, խիզախություն:

Գևորգը մասնակցել է ապրիլյան քառօրյա պատերազմին, մերօրյա հերոս, կապիտան Արմենակ Ուրֆանյանի զինվորն է եղել: Գևորգի զինակից ընկերներն էին Ռոբերտ Աբաջյանը, Քյարամ Սլոյանը: Ցուցաբերած բացառիկ խիզախության համար հրամանատարության կողմից պարգևատրվել է «Գարեգին Նժդեհ» մեդալով:

Շնորհավոր ծննդյանդ տոնը, Գևորգ ջան, բարի ծառայություն քեզ և բարի վերադարձ հայրենի օջախ: Աստված թող միշտ պահապան լինի մեր երկրի սահմանները անառիկ պահող զինվորներին:

Հովհաննես Սարգսյան

Շիրակի մարզ, գյուղ Հայրենյաց

***

Հովհաննես ջան, արդեն 20 տարեկան ես ու զինվոր ես: Ինչքան ենք երազել այս օրը: Քանի անգամ ենք ասել, որ զինվորական համազգեստ հագնելու հետ պատանեկությունդ թողնելու ես հետևում և մտնելու ես նոր՝ տղամարդկային հասունությամբ, պատասխանատվությամբ, խիզախությամբ բնորոշվող կյանք: Շնորհավորելով 20-ամյակդ` մենք առաջին հերթին տղամարդկային արժանապատվություն ենք մաղթում քեզ, որովհետև աշխարհում պատվից թանկ ոչինչ չկա… Մեր ժողովուրդը իմաստուն խոսք ունի՝ արու զավակը հայրենիքինն է, նշանակում է՝ տղամարդու առաջին պարտքը հայրենիքը պաշտպանելն է: Մենք հպարտ ենք, որ մեր որդին զինվոր է… ու քո ծննդյան օրը որքան կարոտելու ենք քեզ, որքան զգալու ենք բացակայությունդ, նույնքան էլ հպարտությամբ ենք լցվելու:

Չկա ավելի գեղեցիկ ընկերություն, քան զինակից ընկերների՝ փորձություններով անցած հավատարմությունը: Վստահ ենք՝ զինվոր ընկերներդ կողքիդ կլինեն ու անմոռաց կդարձնեն տարեդարձդ…

Շնորհավոր 20-ամյակդ, տղա՛ս: Բարի ծառայություն քեզ և ընկերներիդ:

Ամուր գրկում ու համբուրում ենք:

Քո ծնողներ՝ Արտեմ Պողոսյան

Լիանա Ալեքսանյան