ԲԱՆԱԿՈՒՄ ՇԻՆԱՐԱՐՈՒԹՅՈՒՆԸ ՇԱՐՈՒՆԱԿՎՈՒՄ Է ՄԵԾ ԾԱՎԱԼՈՎ

ՀՀ ՊՆ կապիտալ շինարարության եւ զորքերի բնակավորման վարչության պետ, ՔՀԾ 2-րդ դասի պետական խորհրդական ԱՇՈՏ ԳՐԻԳՈՐՅԱՆԻ հետ զրուցեց մեր թղթակից Շուշան Ստեփանյանը:

-Պարոն Գրիգորյան, անցնող շաբաթը հագեցած էր նոր շենք-շինությունների շահագործման հանձնելու արարողություններով: Կարելի՞ է ենթադրել, որ, չնայած ապրիլյան պատերազմին, 2016 թվականին Ձեր ղեկավարած կառույցը շարունակել է շինարարությունը մեծ ծավալով:

-Քառօրյա պատերազմի ժամանակ հակառակորդի կողմից բազում շենքեր, զինավաններ, ենթակառուցվածքներ արկակոծման եւ հրետակոծման ենթարկվեցին, կրեցին լուրջ վնասներ: Եվ մենք մեր ծրագրերում բնականաբար որոշակի խմբագրումներ կատարեցինք:  Առաջնային դարձավ վնասված շենք-շինությունների վերականգնումը, պատերազմի հետեւանքով շարքից դուրս եկած կոնստրուկցիաների ուժեղացումը: Որքան էլ տարին լարված էր, այդուհանդերձ, մեծածավալ աշխատանք կատարեցինք: Շահագործման ենք հանձնել «Սըդըխի գյոլ» կոչված տարածքում կահավորված ուսումնական մասնաշենքը: Երկու տարի տեւած շինարարական բարդ աշխատանքներից հետո գործարկվեց Խնձորեսկի զինավանը, որը հազվագյուտ տիպային կառույց է:  Իրանում տեղի ունեցած երկրաշարժի հետեւանքով Ագարակում շարքից դուրս էր եկել շինություններից մեկը, որը մենք ապամոնտաժել եւ փոխարենը սեյսմիկ չափանիշներին համապատասխան շենք ենք կառուցել: Զորամասերից մեկում կառուցել ենք ճաշարան ու կաթսայատուն, մեկ այլ տեղ՝ կայանատեղի հատուկ տեխնիկայի համար: Վանաձորի կայազորային հոսպիտալի ինֆեկցիոն բաժանմունքն էլ տեղափոխել ենք տիպային նոր շինություն: Շահագործման ենք հանձնել սպառազինության պահեստային տնտեսություններ: Հունվարին շահագործման կհանձնենք Ռազմական ավիացիոն համալսարանի նորակառույց զորանոցը, եւս երկու զորանոց՝ զորամասերից մեկում: Կգործարկվեն հոսպիտալներից մեկի հիմնովին վերանորոգված ինֆեկցիոն եւ վիրահատական մասնաշենքերը: Պատրաստ է տանկային գումարտակներից մեկի նոր զորանոցը, ինչպես նաեւ ավարտել ենք Իջեւանի զինավանի շինարարությունը: Այժմ այն կահավորում ենք ու փորձարկում:

-Պարոն Գրիգորյան, խոսենք նաեւ բնակարանային շինարարությունից:

-Պաշտպանության նախարարը հաստատել է 2017թ. ծրագիրը: Գալիք տարում մեծ թափ կառնի զինծառայողների համար բնակելի շենքերի կառուցումը: 2017թ.-ին նախատեսում ենք սկսել մոտ 10 շենքի շինարարական աշխատանք: Բնակելի շենքեր ենք կառուցելու Ագարակում, Կապանում, Գորիսում, Սիսիանում, Վայքում, Գյումրիում, Երեւանում: ՀՀ-ԼՂՀ համագործակցության շրջանակում բավականին հետաքրքիր շենք կկառուցվի Քարվաճառում, նաեւ՝ Ստեփանակերտում: Շահագործման կհանձնենք 2018 թ.-ին: Իսկ մինչ այդ՝ 2017 թ. աշնանը, շահագործման կհանձնենք Երեւանում կառուցված բնակելի 14 հարկանի շենքը 71 ծառայողական բնակարանով, ինչպես նաեւ՝ 50 բնակարան Սանասարում (Կուբաթլի), երկու շենք էլ՝ Հադրութում:

-Իսկ ի՞նչ նորամուծություններ են նախատեսվում:

-Պաշտպանության նախարարի հանձնարարականով նախատեսվում է զինված ուժերում փուլային տարբերակով անցում կատարել էկոնոմ լամպերի օգտագործմանը:  Քննարկումների ենք հրավիրել թե՛ ներկրող կազմակերպությունների, թե՛ տեղական արտադրողի` «Գյումրիի տեխնոպարկ» ՓԲԸ ներկայացուցիչներին, քանի որ հայկական արտադրանքը բավականաչափ որակյալ է: Ուսումնասիրել  ենք ե՛ւ արտաքին, ե՛ւ ներքին լուսավորության համար առաջարկվող  լամպերը:  Լուսադիոդային (LED) լամպերն ունեն մի շարք առավելություններ՝ ի տարբերություն լույսի ավանդական աղբյուրների: Էլեկտրախնայող են, դիմացկուն: Մենք նախատեսում ենք 1:5, 1:7 տնտեսում: Սա բավականին լուրջ թիվ է: Ակտիվ քննարկումների փուլում է նաեւ արեւային էներգիայի միջոցով մարտական հենակետերում եւ դիրքերում հոսանքի ապահովումը: Հարցը կարեւոր է, քանի որ կապի սարքավորումները, մարտկոցները լիցքավորելու խնդիր ունենք, նաեւ հաշվարկը այնպես ենք կատարում, որ հրամանատարական կետերում հեռուստացույց դիտելու հնարավորություն լինի:

-Պարոն Գրիգորյան, Ձեր կողմից այս տարի մշակվել եւ հրատարակվել է «Զինված ուժերում շինարարական աշխատանքների կազմակերպումն ու զորանոցաբնակելի ֆոնդերի եւ ինժեներական հաղորդակցուղիների շահագործումը (սպասարկումը)» ձեռնարկը, որը նորմատիվային փաստաթուղթ է հիշեցնում:

-Ճիշտ եք: Մեր վարչությունը նորմատիվային փաստաթուղթ չի ունեցել: Երեք տարի ուսումնասիրել ենք ոլորտը, ապա եւ հրատարակել 500 էջանոց այս ձեռնարկը: Ձեռնարկում ընդգրկված են մեր ոլորտը կանոնակարգող նյութեր: Դասակարգել ենք շենք-շինությունները, անդրադարձել շինմոնտաժային աշխատանքների կատարման տեխնոլոգիային, մանրամասն նշել ենք, թե զինված ուժերում ինչպես պետք է կազմակերպվեն ընթացիկ նորոգման աշխատանքները, ինչպես շահագործվեն շինությունները, համակարգերը, օրինակ` տանիքները, նկուղները, սալիկներով երեսպատված մակերեսները, հատակները, ջրագծերը, կոյուղագծերը, ջեռուցման գծերը: Առանձին գլխով ներկայացրել ենք շենք-շինությունների ապամոնտաժման կարգը, նաեւ` զինված ուժերի շենքերի, կառույցների, ենթակառուցվածքների կոնսերվացումը եւ դրանց շահագործումը կոնսերվացումից հետո: Եթե զորամասը դուրս է գալիս ճամբարային հավաքի, ապա երկարաժամկետ կամ կարճաժամկետ կոնսերվացումը պարտադիր է: Անդրադարձել ենք կաթսայատան սարքավորումների եւ ջերմային գծերի շահագործմանը: Մեկ այլ գլուխ էլ նվիրված է զինավանների, զորանոցաբնակարանային ֆոնդի, կոմունալ կառույցների, ենթակառուցվածքների ձմեռային նախապատրաստմանը: Ձեռնարկում շինանյութերի  մասին 80 տեղեկատու հավելված է ներառված : Գրքից կարող են օգտվել նաեւ ուսանողները:  Ի վերջո, շինարարությունը գիտություն է, ուստի պետք է բացառել ցանկացած կամայականություն:

-Քանի որ խոսեցիք ձմեռային նախապատրաստությունից, հետաքրքիր է՝ պատրա՞ստ ենք ցրտին ու սառնամանիքին:

-Ինձ ամեն օր զեկուցում են` ջեռուցման համակարգերում վթար ունե՞նք, թե՞ ոչ, կաթսայատները բնականոն աշխատո՞ւմ են, թե՞ ոչ: Վերջին ձյան պատճառով 18 վթար ենք ունեցել: Որոշ տեղերում խափանվել էին թե՛ էլեկտրական, թե՛ ջեռուցման գծերը, ջրագծերն ու կաթսայատները: Սակայն խնդիրները օպերատիվորեն կարգավորել ենք, քանի որ ապահովված ենք բոլոր անհրաժեշտ միջոցներով: Զորանոցներում այժմ անխտիր 18 աստիճան ջերմություն է, բուժկետերում` 20, չորանոցներում` 50:

-Պարոն Գրիգորյան, իսկ որտե՞ղ եք թերացումներ արձանագրել: 

– Տարվա ընթացքում զորամասերում շարունակ խմբեր են աշխատել եւ ստուգել 124 ճաշարան, 170 բաղնիք-ցնցուղարան, 700 զուգարան-լվացարան, որոնց արդյունքում հայտնաբերվել են շահագործման հետ կապված լուրջ խնդիր: Հատկապես՝ սանհանգույցների մասով: Վերահսկողությունը որոշ տեղերում թույլ  է, ինչի հետեւանքով աչքաթող են արել այս շինությունների սպասարկումը: Ուստի խնդրում եմ հատկապես վաշտ-մարտկոցի հրամանատարներին` «Ուշադիր եղեք, եղեք հոգատար, ինչպես ձեր սեփական տանը»: