ՀՆՉԵՑ ԱՌԱՋԻՆ ԶԱՆԳԸ. ԱՐԻՈՒԹՅԱՆ ԴԱՍԵՐ ԿՐԹՕՋԱԽՆԵՐՈՒՄ

Սեպտեմբերի 1-ին Գորիսի թվով վեց՝ միջնակարգ և ավագ դպրոցներում դպրոցական հաստատություններում կազմակերպված և բարձր մակարդակով անցկացվեցին առաջին զանգի տոնական միջոցառումներ, որին մասնակցում էին մարզի և տեղական իշխանությունների ներկայացուցիչներ, լրագրողներ, ծնողներ, բազմաթիվ հյուրեր, քաղաքացիներ:

Գիտելիքի, գրի և դպրության օրվա, 2017-2018 թթ նոր ուսումնական տարվա բացման առթիվ կազմակերպված  տոնախմբություններին ընթերցվեց  զորամիավորման հրամանատար,  գեներալ-մայոր Տիգրան Փարվանյանի բարեմաղթանքի և շնորհավորական ուղերձը՝ ուղղված Սյունիքի մարզի դպրոցականներին և ուսուցչական կոլեկտիվներին:

Շնորհավորելով և բարեմաղթելով դպրոցականներին, մատաղ սերդի կրթության և դաստիարակության պատվավոր գործին  կոչված մանկավարժներին,  ուղերձում մասնավորապես շեշտվեց, որ հայ ժողովրդի գոյապաշտպանության դժվարին ճանապարհին գրապաշտ ազգի համար կրթությունը միշտ էլ կարևոր նշանակություն է ունեցել, եղել է պաշտանմունքի, լուսավոր և հաղթական ապագայի հիմնական գործոն, որով առաջնորդվել ենք մեր հազարամյա պատմության քառուղիներում, գիրն ու դպրությունը մեզ համար դարձրել փրկության ճանապարհ:

Եվ այսօր էլ մեր ժողովրդի ապագան կերտվում է կրթական հաստատություններում՝ իբրև հայրենասիրության և հայրենագիտության վառ տաճարներ,-ասված էր ուղերձում:

Առաջին դասարանցիները ծնողների և ուսուցիչների ուղեկցությամբ մուտք գործեցին  դասասենյակներ, որտեղ նրանց ուրախ անակնկալ էր սպասվում. Սյունիքի մարզպետ Վահե Հակոբյանի կողմից տրամադրվեցին գրենական պիտույքներ:

Բարձր դասարանացիների հետ զորամիավորման սպաներն անցկացրին <<Արիության դասեր>> , որոնց ընթացքում կարևորեցին աշակերտության ռազմահայրենասիրական դաստիարակությունը՝ որպես  վաղվա  քաղաքացու և հայրենասեր հայի ձևավորման  բաղկացուցիչ մաս,  ռազմահայրենասիրական ոգին, համառոտ ներկայացվեցին հայ ժողովրդի անցած հերոսական ուղին, Արցախյան գոյամարտն ու քառօրյան, նրա հերոս զինվորների և սպաների սխրանքների մասին:

1-ին զորամիավորման լրատվական ծառայություն