ԱՇԱԿԵՐՏՆԵՐԻ ԱՅՑԸ ԶՈՐԱՄԱՍ

Գորիսի թիվ 4 ավագ դպրոցի 10-12-րդ դասարանների աշակերտներն օրերս այցելեցին 1-ին ԶՄ  զորամաս:

Նրանց ուղեկցում էին դպրոցի զինղեկ, մայոր Սամվել Առուստամյանը, զորամիավորման ավագ սպա, իրավաբան, մայոր Տաճատ Էմինին, մարզային ոստիկանության Գորիսի բաժնի ԱԳ  դպրոցական տեսուչ, լեյտենանտ Լիլիթ Դանիելյանը:

Աշակերտներին պատշաճ դիմավորեցին ստորաբաժանման հրամանատար, փոխգնդապետ Վիգեն Մկրտչյանը, հրամանատարի ԱՀՏԱ գծով տեղակալ, մայոր Գագիկ Հարությունյանը:

Մայոր Հարությունյանն աշակերտներին ներկայացրեց զորամասի պատմությունը, նրա կազմավորման տարեգրությունը, անցած մարտական ուղին, ՀՀ և ԼՂՀ Ազգային հերոսներին, քառօրյա պատերազմին  անձնակազմի մասնակցության, առավել աչքի ընկած զինծառայողների մարտական սխրանքների, շուրջ երեք տարի ստորաբաժանումում պահվող պատվո դրոշի նշանակության մասին:

Մայոր Հարությունյանը աշակերտների հետ շրջեց զորամասի տարածքում, ծանոթացրեց ենթակառուցվածքներին:

Աշակերտները իրազեկվեցին անձնակազմի առօրյայի, շարահրապարակում անցկացվող մարտական վարժությունների, զինվորի կենցաղի, հանդերձանքի,  բուժսպասարկման, սննդի ու ժամանցի, օրվա ընթացքում անցկացվող պարապմունքների  մասին:

Նրանք եղան նաեւ ստորաբաժանման  հավաքակայանում, որտեղ ծանոթացան արդի սպառազինության նմուշներին, խոշոր տրամաչափի ականանետներին, դրանց հետ վարվելու, դիպուկ և անվրեպ կրակելու կանոններին:

Սպորտային ավանում վարժություններ կատարեցին պտտաձողի վրա, բարձրացրին ծանրաձողեր:

Այնուհետեւ տեղեկատվության և ժամանցի սենյակում մայոր Էմինին  իրավական թեմայով զրույց ունեցավ աշակերտների հետ, ներկայացրեց զինծառայողների իրավունքները և պարտականությունները, «Ես եմ» հայեցակարգը:

Աշակերտների համար հագեցած և ուսանելի օր էր, զինվորների, նրանց առօրյայի հետ շփումից աշակերտները խորապես տպավորված և ոգևորված էին:

1-ԻՆ ԶՄ ԼՐԱՏՎԱԿԱՆ ԾԱՌԱՅՈՒԹՅՈՒՆ