ՀԱՂԹՈՂ Ե՛Վ ՄԱՐՏՈՒՄ, Ե՛Վ ԳԻՏԱՄԱՐՏՈՒՄ

–Արտաշես արքան որտե՞ղ էր  դրել Հայոց սահմանաքարերը:

–Այնտեղ, որտեղ ավարտվում  էր հայերենը:

 Համաբանակային «Հայ ասպետ» սիրված հեռուստանախագծի  կիսաեզրափակիչ  փուլն է: Նախնական փուլում 44 մասնակից թիմերից կիսաեզրափակիչ են դուրս եկել 9-ը: Լարված ու կենտրոնացած են զինվորները, աշխատում են անսխալ պատասխանել:

–Արդեն չորս տարի  է՝ «Հայ ասպետը» մուտք է գործել բանակ: Զինված ուժերի զորամասերում «Հայ ասպետ» կրթամշակութային ակումբներ են ստեղծվել,  նպատակն է խթանել զինծառայողների հետաքրքրությունների, նախասիրությունների  շրջանակը, նպաստել զինվորների շրջանում հայրենագիտական  եւ իրավական գիտելիքների տարածմանը,- նշում է «Հայ ասպետ» հեռուստախաղի հեղինակ–վարող Կարին Տոնոյանը,- մեր  զինվորները փայլում են ոչ միայն  կռվի դաշտում, այլեւ գիտամարտում:

Իսկ զինվորներն իսկապես լավ պատրաստված են, հարցերին տալիս են հիմնավոր պատասխաններ: Նախապես նրանց անհրաժեշտ գրականություն էր տրամադրվել, դիդակտիկ նյութեր, եւ տղաները գերազանց նախապատրաստվել են: Հարցաշարը տարբեր ոլորտներից է, բազմազան՝  իրավագիտություն, պատմական Հայաստան, գրականություն, աշխարհագրություն, զինվորական թեմատիկա…

Մեր զինվորները  նաեւ  լավ նվագում են, երգում… Երաժշտագետ Նունե Աթանասյանը նկատում է. «Այնպես կատարյալ են մատուցում, զգայական շերտերով, խորքային: Հուզվելու աստիճան հիացած եմ»:

Խաղն ավարտվում է, եզրափակիչ են անցնում առավելագույն միավորներ հավաքած  երեք թիմերը, առաջատարը գնդապետ Գ. Գաբրիելյանի հրամանատարությամբ գործող զորամասի զինվորներն են: Լավագույն զինվորները խրախուսվում են:  Ամսվա վերջին եզրափակիչն է` վճռորոշ փուլը…

Շավարշ Զոհրաբյան. «Մոնթե» թիմի ավագ, սերժանտ. «Այս փուլում առավելագույն արդյունքը մենք ենք հավաքել: Անսահման ուրախ ենք: Ոմանց մոտ մինչ ծառայության գալը սխալ կարծիք կար բանակի մասին, մտածում էին՝ կտրվելու են հասարակությունից, որ  բանակ–հասարակություն կապը միայն տեսական է, մինչդեռ՝ գործնականի վառ օրինակ է հենց «Հայ ասպետ» խաղը: Բանակը նաեւ դաստիարակիչ, կրթական գործառույթ ունի, բանակը մի դպրոց է, որը տալիս է մեծ փորձ, գիտելիք…»:

Րաֆֆի Թադեւոսյան. «Հայք» թիմի ավագ, շարքային. «Հայ ասպետ» հեռուստախաղը  բանակային առօրյան դարձնում է առավել հետաքրքիր, առավել հագեցած: Հարստացնում ես գիտելիքներդ, տարբեր բնագավառներից նոր գիտելիք, տեղեկություն ձեռք բերում: Ինչ խոսք՝ հաղթանակը շատ կարեւոր է, բայց ով էլ հաղթի, մի բան պարզից  էլ պարզ է՝ հայ զինվորի  հաղթանակն է»:

 ԱԼԻՍ ԱԼԱՎԵՐԴՅԱՆ

Լուս.՝ ԱՐԵԳ ՎԱՐԴԱՆՅԱՆԻ