Հայ զինվոր

ԱԶԴԱՐԱՐՎԵՑ ՌԱԶՄԱԿԱՆ ՀԱՄԱԼՍԱՐԱՆԻ ՄԵԾԱԾԱՎԱԼ ՎԵՐԱԿԱՌՈՒՑՄԱՆ ԾՐԱԳԻՐԸ

Պաշտպանության նախարարության մարշալ Արմենակ Խանփերյանցի անվան ավիացիոն եւ Վազգեն Սարգսյանի անվան ռազմական համալսարանները կմիավորվեն: Աշխատանքային խումբն այժմ քննարկում է երկու հաստատությունների միաձուլման նախագիծը: Ուսումնական գործընթացը կկազմակերպվի Վազգեն Սարգսյանի անվան ռազմական համալսարանի տարածքում: Համալիրի շինությունների նորոգման և վերակառուցման մեծածավալ ծրագրի իրականացման համար «Իզմիրլյան» հիմնադրամը 5 միլիոն ԱՄՆ դոլար տրամադրեց պաշտպանության նախարարությանը: Համապատասխան հուշագիրը ՀՀ պաշտպանության նախարար Վիգեն Սարգսյանն ու «Իզմիրլյան» հիմնադրամի փոխնախագահ Գրեգ Ջերեջյանը ստորագրեցին դեկտեմբերի 13-ին:

Պաշտապնության նախարարը համոզված է՝ լավ սպաներ ունենալու համար կրթական լավ պայմաններ են պետք. «Ռազմական կրթության որակի բարելավման եւ ռազմական համալսարանը բուհական համակարգի ու միջազգային չափանիշներին համապատասխանեցնելու խնդիր ունենք: Այդ առումով առաջին քայլը կատարեցինք այս տարի, երբ Մոնթե Մելքոնանի անվան ռազմական վարժարանը տեղափոխեցինք Դիլիջան: Այժմ կարեւոր է բարեփոխման ծրագիր սկսել սպաներ կրթող գլխավոր ուսումնական հաստատությունում՝ Վազգեն Սարգսյանի անվան ռազմական համալսարանում»:

Ամիսներ առաջ պաշտպանության նախարարությունը «Իզմիրլյան» հիմնադրամին ներկայացրեց զինվորական կրթության համակարգի արմատական բարեփոխման տեսլականը: Համալսարանը ժամանակին ուներ լավագույն շենքային պայմանները նաեւ հիմնադրամի աջակցության շնորհիվ. 1996-1998 թթ. հիմնադրամի միջոցներով են կառուցվել ռազմական համալսարանի երկու զորանոցային մասնաշենքերը, իսկ 1998-2001 թթ․՝ ջերմաէներգետիկ համալիրն ու խոհանոցային մասնաշենքը. «Անցել է քսան տարի, եւ մենք այսօր կատարում ենք հաջորդ քայլը: Պետք է շնորհակալություն հայտնեմ հիմնադրամին, որ մեր առաջին իսկ խնդրանքով պատրաստակամություն հայտնեց նվիրատվություն կատարելու: Մեր նպատակն է չորս մասնաշենքերը վերածել գերժամանակակից ուսումնական համալիրի, որը գրավիչ կլինի երիտասարդների համար»,-նշեց Վիգեն Սարգսյանը:

Էսքիզային նախագիծն արդեն պատրաստ է: «QCA» ճարտարապետական արվեստանոցի հիմնադիր Էրիկ Հովհաննիսյանը ներկայացրեց գերժամանակակից ռազմական համալսարանի վերաբերյալ իր պատկերացումները: Ճարտարապետական լուծման հիմքում նախարարի մտահղացումն է. «Սկզբում տատանվում էինք՝ կառուցե՞լ նոր մասնաշենք, թե օգտագործել կիսակառույց մարզական դահլիճը: Երկար պրպտումների արդյունքում գտանք լուծումը: Ներքին բակերը կկառուցապատենք ապակե տանիք ունեցող երկհարկանի շենքերով, ինչի շնորհիվ տարածքը կընդլայնվի երեք հազար քառակուսի մետրով: Կվերանորոգենք եւ պահանջներին կհամապատասխանեցնենք համալսարանի չորս մասնաշենքերը՝ ստանալով ժամանակակից համալիր»,- ասաց ճարտարապետը:

Համալսարանը կունենա 540 կուրսանտի եւ սպայի համար նախատեսված մեկ ընդհանուր ճաշարան, որը կգործի ինքնասպասարկման սկզբունքով: Մարզադահլիճը հագեցած կլինի բարձրակարգ սարքավորումներով, իսկ տղաների ու աղջիկների հանդերձարանները կառանձնացվեն: Լողավազանը կհամապատասխանի օլիմպիական չափանիշներին՝ 25 մետր երկարություն, 10 մետր լայնություն: Բակերից մեկն էլ գրադարան ու համակարգչային կենտրոն կդառնա՝ ունիվերսալ կահավորմամբ: Հրամանատարական գրասենյակներն աստիճաններով կմիանան կիսանկուղային հարկին, որը կվերածվի պահեստային ենթակառուցվածքի: Ռազմական համալսարանի չորս մասնաշենքերից երկուսը կվերափոխվեն հանրակացարանների: Երրորդ եւ չորրորդ կուրսերի ուսանողներին կառաջարկվեն հանրակացարանային յոթ եւ երեք սենյականոց ննջարաններ՝ սանհագույցներով, ցնցուղարաններով, անձնական պահարաններով, դասապատրաստման եւ հանգստի գոտիներով:

Ճարտարապետները չեն մոռացել նաեւ ժամանցի մասինի՝ թենիսի ու շախմատի սեղաններ, նաեւ երաժշտական փոքրիկ ստուդիա, որտեղ կուրսանտները կձայնագրեն իրենց կատարումները: Լվացքատանն էլ ապագա սպաները ինքնուրույն կլվանան, կչորացնեն ու կարդուկեն համազգեստը: Բուժկետը կմեծանա, իսկ թանգարանը կմնա նույն տեղում:

Շենքը նախատեսված է 800 կուրսանտի համար: Ծրագրի ընդհանուր բյուջեն 7.5 միլիոն ԱՄՆ դոլար է: «Իզմիրլյան» հիմնադրամը հատկացրել է 5 միլիոն դոլարը, իսկ մնացած գումարը կհայթայթի պաշտպանության նախարարությունը: