ՇՆՈՐՀԱՎՈՐԱԿԱՆ ՈՒՂԵՐՁ. 1-ԻՆ ԶՈՐԱՄԻԱՎՈՐՄԱՆ ՀՐԱՄԱՆԱՏԱՐ, ԳԵՆԵՐԱԼ-ՄԱՅՈՐ ՏԻԳՐԱՆ ՓԱՐՎԱՆՅԱՆ

Սիրելի՛ զինծառայողներ, վտանգի պահին միշտ առաջնագծում հայտնվող  կամավորականներ, բանակի թիկունքն ամուր պահող սիրելի քաղաքացիներ, հայկյան երկրի հզոր բանակի տեսլականով առաջնորդվող աշխարհասփյուռ  հայրենակիցներ. 2017-ին հրաժեշտ են տալիս առյուծասիրտ հերոսներ ծնող  Հայաստանն ու Արցախը:

Որպես 1-ին բանակային զորամիավորման հրամանատար՝ հպարտ եմ բանակաշինության գործում մեր զորամիավորման ունեցած կարևոր դերակատարությամբ:

2017 ուսումնական տարվա մարտական առաջադրանքների կատարման գործում մեծ առաջընթաց արձանագրած մեր զորամիավորման տարեգրությունում գրվեց ևս մի փայլուն էջ: Անցկացվեց մեծամասշտաբ զորավարժություն:

Այն մոտեցվել էր իրական պատերազմական գործողությունների իրավիճակին, որպեսզի երևար հարձակողական մարտում մեր զորամիավորման ամբողջ կարողությունը:

Հպարտորեն հայտնում եմ ժողովրդին, որ 1-ին զորամիավորումը մարտունակության բարձր աստիճանի է, և մեր զինծառայողները պատրաստ են կատարելու ցանկացած մարտական խնդիր:

Երկրի խաղաղությունն ապահովելը, Հայրենիքի սահմանները թշնամու ոտնձգություններից պաշտպանելը մշտապես կմնա մեր կարևորագույն առաքելությունը:

Թող 2018 թ. մեր ժողովրդի համար լինի լիակատար խաղաղության, ստեղծագործ աշխատանքի, երկրի կայուն զարգացման, ժողովրդի բարեկեցության, հայ ընտանիքի զորացման տարի:

Շնորհավոր Ամանոր և Սուրբ Ծնունդ: