ԱՐՑԱԽՅԱՆ ՇԱՐԺՄԱՆԸ ՆՎԻՐՎԱԾ ՄԻՋՈՑԱՌՈՒՄՆԵՐ

Արցախյան շարժման 30-ամյակին նվիրված՝ հանրապետության բոլոր շրջաններում ու մայրաքաղաք Ստեփանակերտում անցկացվում են տոնական միջոցառումներ: Փետրվարի 19-ին Արցախի Հանրապետության Նախագահի նստավայրում տեղի է ունեցել Արցախյան ազգային-ազատագրական շարժման 30-րդ տարեդարձի կապակցությամբ և Արցախի Հանրապետությանը մատուցած ծառայությունների համար պարգևատրման հանդիսավոր արարողություն: Նախագահ Բակո Սահակյանը «Գրիգոր Լուսավորիչ», «Մեսրոպ Մաշտոց» շքանշաններով և «Վաչագան Բարեպաշտ», «Մխիթար Գոշ» և «Անանիա Շիրակացի» մեդալներով պարգևատրել է շարժման ակունքներում կանգնած անձանց, որոնց մի մասին՝ հետմահու: Իր խոսքում Բակո Սահակյանն Արցախյան շարժումը որակել է որպես մեր ժողովրդի նորագույն պատմության ամենավառ էջերից մեկը: «Այդ պարգևները ձեր ամենօրյա անձնվեր ծառայության և քրտնաջան աշխատանքի գնահատականն են»,- նշել է նախագահը:  «Վաչագան Բարեպաշտ» մեդալով է պարգևատրվել նաև Քաշաթաղի շրջանային «Մերան» թերթի գլխավոր խմբագիր, Արցախյան շարժման և ազատամարտի մասնակից Զոհրաբ Ըռքոյանը:

Նույն օրը Քաշաթաղի շրջկենտրոն Բերձորի Վ. Թեքեյանի անվան միջնակարգ դպրոցում կայացավ միջոցառում:

Այն սկսվեց Արցախյան շարժման և հետագա պատերազմական տարիներին արված և դրանց մասին պատմող մոտ 50 լուսանկարների ցուցադրությամբ: Հեղինակը Զոհրաբ Ըռքոյանն է, ով 88-ին համալսարանական ընկերների հետ մասնակցել է ցույցերին, հետագայում էլ՝ ազատամարտին: Յուրաքանչյուր լուսանկար ունի պատմություն՝ ներկայացնելով կոնկրետ իրադարձություն և անհատ: Ցուցահանդեսի շարունակությունը Զ. Ըռքոյանի դստեր՝ Անահիտի՝ Հայաստանի գեղարվեստի պետական ակադեմիայի 3-րդ կուրսի ուսանողուհու գեղանկարչական աշխատանքներն էին, որոնք մինչ այդ ցուցադրվել էին Երևանում: Աշխատանքներից հատկապես ուշադրության արժանացավ Շուշիի ազատագրմանը նվիրված կոլաժը:

Այդուհետ ԱՀ ԱԺ պատգամավոր Ալյոշա Գաբրիելյանը պատմեց արցախցու՝ Խորհրդային Ադրբեջանին բռնակցված տարիների կողմնակալ կարգավիճակի մասին, շարժման ոգու և Մայր հայրենիքին միանալու երազանք-ՄԻԱՑՈՒՄԻ մասին: Շեշտեց երիտասարդ սերնդի հայրենասեր, կիրթ ու գիտակից լինելու կարևորությունը: Վերջում համերգային մասով ներկայացավ Բերձորի «Բերձոր» ժողգործիքների համույթը: Միջոցառման ընթացքում էկրանին ցուցադրվեց փաստագրական ֆիլմ՝ նվիրված 1988թ. Ստեփանակերտում ծավալված իրադարձություններին: Տոնական միջոցառմանը ներկա էին Քաշաթաղի շրջվարչակազմի ղեկավար Սուրեն Խաչատրյանը և Լեռնիկ Հովհաննիսյանը, այլ պաշտոնատար անձինք, Բերձորի ու հարակից բնակավայրերի բնակիչներ, հյուրեր:

Վարսենիկ Ըռքոյան