ՀԱԿԱՌԱԿՈՐԴՆ ԱՌԱՋՆԱԳԾՈՒՄ ՉՈՒՆԻ ԱՅՆՊԻՍԻ ՄԻՋՈՑՆԵՐ, ՈՐ ՀՆԱՐԱՎՈՐ ՉԼԻՆԻ ԽՈՑԵԼ

ԳՈՌ ԱՎԱԼՅԱՆ, փոխգնդապետ

Պաշտպանական շրջանի հրամանատարի տեղակալ

-Սահմանի հարավարեւելյան հատվածում հակառակորդը միշտ էլ ակտիվ է՝ հաճախ է խախտում հրադադարը, տեղաշարժեր կատարում:  Հետեւում ենք, մանրակրկիտ վերլուծում եւ, ըստ այդմ, որոշումներ ընդունում:  Համապատասխան ստորաբաժանումներով ուժեղացնում ենք այս կամ այն ուղղությունը, մարզումներ ենք իրականացնում, անմիջապես հաշվարկում ենք նոր կրակակետերի կոորդինատներն ու նշանառության տակ պահում:  Հակառակորդն առաջնագծում չունի այնպիսի միջոցներ, որ հնարավոր չլինի խոցել: Մարտական հերթապահությունում ընդգրկված արդի սպառազինությունը մեզ թույլ է տալիս միաժամանակ մեծ քանակի տեխնիկա շարքից հանելու: Ժամանակակից հակատանկային (կորնետ, արդիականացված ֆագոտ), ինչպես նաեւ հրետանային միջոցները նշանառության տակ են պահում բոլոր այն բնագծերը, ուղիները, որտեղից առաջխաղացման սպառնալիք կա:

Տեղադրված սարքավորումների շնորհիվ էլ ունակ ենք միանգամից հայտնաբերելու հակառակորդին:  Դիվերսիոն հետախուզական խմբերը ոչնչացնելու համար այլեւս կարիք չկա անձնակազմն ամբողջությամբ բացազատելու կամ ինչ-որ հատվածում կենտրոնացնելու: Մարտական դիրքերում տեղադրված են հայրենական արտադրության հեռակառավարվող խոցման միջոցներ, որոնք համակցված են ջերմատեսիլ դիտարկման համակարգին: Մեկ սեղմում, եւ հակառակորդը խոցված է:

Մարտական հերթապահությունն անվտանգ կազմակերպելու համար կատարում ենք հողաշինարարական աշխատանքներ, լրակահավորում ենք դիրքերը, ինժեներական լուծումներով ամրացնում ենք դիտակետերը: Հակառակորդն այսօր մեր խրամաբջիջում մեզ խոցելու հնարավորություն չունի: Դժբախտ պատահարները հիմնականում անվտանգության կոպիտ խախտումների հետեւանք են: Հաճախ զինվորը, արհամարհելով հակառակորդին, դուրս է գալիս դիտարկվող տարածք, գլուխը հանում է չնախատեսված տեղից կամ էլ փորձում է ինչ-որ բան ապացուցել ընկերներին: Ուստի, հորդորում ենք խստիվ պահպանել կարգապահությունը, ձեւավորել առողջ փոխհարաբերություններ, վստահություն ու փոխգործակցություն՝ հանուն անվտանգ մարտական հերթապահության:

Պատրաստեց Շ. ՍՏԵՓԱՆՅԱՆԸ