ԱՄՐԱՊՆԴԵԼՈՎ ԵՐԿՐԻ ՌԱԶՄԱԿԱՆ ԱՆՎՏԱՆԳՈՒԹՅՈՒՆԸ

Օրերս Հայաստանում էին ՌԴ ԶՈՒ Գլխավոր շտաբի ռազմական ակադեմիայում մագիստրոսական պատրաստության երկամյա ծրագրով ուսանող ԶՈՒ ավագ սպաներից երկուսը` գնդապետ Վահրամ Գրիգորյանն ու գնդապետ Ալեքսանդր Ցականյանը: Իրենց երկարատև` ավելի քան քսանամյա զինծառայության ընթացքում հրամանատարական տարբեր կարևոր պաշտոններ զբաղեցրած սպաները, ավարտելով ակադեմիական ուսումնառության առաջին տարին, ՀՀ զինված ուժերում երկշաբաթյա զորային ստաժավորում էին անցնում. սկզբում` զորամիավորումներից մեկի շտաբում, այնուհետև` ԳՇ օպերատիվ և ռազմավարական պլանավորման վարչություններում:

Գլխավոր շտաբի ռազմական ակադեմիան ՌԴ բարձրագույն զինվորական ուսումնական հաստատություն է, որը զբաղվում է ՌԴ ԶՈՒ, այլ  նախարարությունների, ինչպես նաև օտարերկրյա բարձրագույն և ավագ սպայակազմի ներկայացուցիչների ուսուցման, պատրաստության և որակավորման բարձրացման խնդիրներով: Այստեղ ուսուցանվում է խոշոր զորախմբերի, զորամիավորումների հրամանատարական կազմը: Միաժամանակ, այս կրթօջախը ռազմական անվտանգության ապահովման, ռազմական և պետական ղեկավարման ու մի շարք այլ կարևոր հարցերի շուրջ գիտահետազոտական աշխատանքներ իրականացնող ՌԴ առաջատար ռազմաուսումնական հաստատությունն է:

ՀՀ զինված ուժերի ստեղծման առաջին իսկ տարիներից ՌԴ ԶՈՒ ԳՇ ռազմական ակադեմիան հյուրընկալել է նաև մեր բանակի բարձրաստիճան սպաներին: Համաձայն ծրագրի` ակադեմիայում սովորող մեր սպաներն այժմ ուսումնասիրում են «Ազգային անվտանգություն», «Պետական կառավարում», «Ռազմավարություն», «Օպերատիվ արվեստ», «Ռազմական տնտեսագիտություն» և հարակից այլ առարկաներ` հընթացս աշխատելով իրենց մագիստրոսական թեզերի վրա:

Գնդապետ Վահրամ Գրիգորյանը մինչև ակադեմիա մեկնելը զբաղեցրել է վարչության պետի տեղակալի պաշտոնը: «Շատ կարևոր է այսպիսի բարձրագույն ուսումնական հաստատությունում սովորելու հնարավորությունը,- նշում է գնդապետը,- ոչ բոլոր երկրներում կան նման ուսումնական հաստատություններ, և ցանկացած երկրի սպայակազմ չէ, որ նման ուսումնառության հնարավորություն ունի: Ուսումնական գործընթացը շատ հետաքրքիր է ու բովանդակալից: Մեզ հնարավորություն է ընձեռվում առնչվելու ինչպես ռուսական, այնպես էլ այլ երկրների ռազմաքաղաքական մտքին, այս ոլորտում նորագույն ուսումնասիրությունների արդյունքներին, պատկերացում կազմելու ժամանակակից պատերազմական գործողությունների, դրանց նախապատրաստման, վարման մեթոդների մասին»:

Գնդապետ Ալեքսանդր Ցականյանը ԶՈՒ-ում ծառայությունն սկսել է 1990-ական թվականների սկզբին` զբաղեցնելով հրամանատարական տարբեր պաշտոններ: Վերջինը զորամիավորման շտաբի պետի պաշտոնն է: «Սա շարունակական գործընթաց է,- նշում է գնդապետը:- Մեր բանակի սպաները մշտապես ներգրավվում են ՌԴ ԶՈՒ ԳՇ ռազմական ակադեմիայի և այլ երկրների համանման բարձրագույն ռազմական կրթօջախների ուսումնական գործընթացում` միշտ բարձր արդյունքներ գրանցելով: Եվ, իհարկե, ստացված գիտելիքները, ի շահ մեր պետության, մեր զինված ուժերի կիրառելիս պետք է մշտական դրական առաջընթաց գրանցենք: Այս ամենն, ի վերջո, նպաստում է մեր պետության ռազմական անվտանգության հետագա ամրապնդմանը»:

Ներկայումս սպաներն աշխատում են իրենց մագիստրոսական թեզերի վրա, որոնք նվիրված են ՀՀ ռազմական անվտանգության ապահովման համակարգին և, ընդհանուր առմամբ, նպատակ ունեն նպաստելու պետության անվտանգության ապահովմանն ուղղված համալիր միջոցառումների իրագործմանը: «Մեր գիտական թեզերի նպատակը պետությանն սպառնացող վտանգների ու սպառնալիքների ուսումնասիրությունն է տարբեր ոլորտներում,-պարզաբանում է գնդապետ Գրիգորյանը,- իհարկե` շեշտադրում ենք անում նախ և առաջ ՀՀ ռազմաքաղաքական սպառնալիքներին և դրանց չեզոքացման ուղղությամբ իրականացվելիք միջոցառումներին: Անհրաժեշտության դեպքում նաև` ռազմական ագրեսիան հետ մղելու արդյունավետ միջոցներին ու մեթոդներին»:

Ստաժավորման փուլը, սպաների համոզմամբ, նրանց ուսումնառության և իրականացվող ուսումնասիրությունների ամենակարևոր ու հետաքրքրական փուլերից է, երբ մոտենում է թեզերի արդյունքների գործնական փորձարկման, դրանց տեղայնացման խնդիրների վերլուծության ժամանակը: «Կատարվող ուսումնասիրությունը լիարժեք դարձնելու նպատակով մեր մեթոդիկան, արված եզրահանգումները պետք է գործնականում փորձարկենք, անհրաժեշտ ուղղումներ մտցնենք և հետագա ուսումնասիրություն կատարենք: Անշուշտ, մեր դրույթների քննարկումն այն պաշտոնատար անձանց հետ, որոնք անմիջականորեն զբաղված են տվյալ խնդիրների լուծմամբ, անգնահատելի փորձառություն է,- ընդգծում է գնդապետ Գրիգորյանը,- հենց այս փուլում է, որ լուծվում է ստացված արդյունքների տեղայնացման խնդիրը, և կարծիքների փոխանակումն ու համատեղ քննարկումները նպաստում են լավագույն ուղիների ընտրությանը»:

Առջևում դեռ մեկ ուսումնական տարի կա: Իսկ ռազմական ակադեմիան ավարտելուց հետո սպաները կվերադառնան ՀՀ ԶՈՒ` իրենց նպաստը բերելու մեր պետության կարևորագույն բաղադրիչներից մեկին` ռազմական անվտանգության ապահովմանը:

ՔՆԱՐ ԹԱԴԵՎՈՍՅԱՆ

Լուս.` ԱՐԵԳ ՎԱՐԴԱՆՅԱՆԻ