ՀՈՐ ՀԻՇՈՂՈՒԹՅՈՒՆՆԵՐԸ ՊԱՏԵՐԱԶՄՈՒՄ ԶՈՀՎԱԾ ՈՐԴՈՒ ՄԱՍԻՆ

«Հիշողություն մանկության ուղիով» եւ «Ես անցա դժոխքի միջով».  սրանք  Արցախյան ազատամարտի հերոս Վահագն Վարդևանյանի հիշատակը վառ պահող  երկու մատյաններ են:  Հերոսի անունը կրող դպրոցում տեղի ունեցավ Վահագնի  հոր՝ Վաղինակ Վարդևանյանի հեղինակած գրքերի շնորհանդեսը, որն ուղեկցվեց հեղինակի  կյանքին ու անցած ճանապարհին նվիրված միջոցառմամբ:

«Հիշողություն մանկության ուղիով» գիրքը պատմում է հեղինակի մանկության, պատանեկության և երիտասարդության մասին:  Իսկ «Ես անցա դժոխքի միջով» գիրքը հուշագրություն է որդեկորույս հոր տոկունության, կրած տառապանքների մասին:

Դժվար ու անհաղթահարելի թվացող ճանապարհ է անցել Վահագն Վարդևանյանի հայրը: Այն օրից, երբ որդին զոհվել է, հոր միակ նպատակը որդու դին փրկելն է եղել. «Երբ իմացա, որ տղայիս ու նրա 13  զինվորների  ճակատագիրը անհայտ է, որոշեցի մեկնել Արցախ: Մինչև Ստեփանակերտ հասնելը ստիպված էի շատ դռներ բացել, հաղթահարել բազում փորձություններ»:

Վահագն  Վարդևանյանն իր ջոկատի 13 անդամների հետ Մարտակերտի շրջանի Կարմիրավան գյուղի մատույցներում հայտնվել է շրջափակման մեջ:  13 ազատամարտիկների զոհվելուց հետո էլ վիրավոր հրամանատարը շարունակել է միայնակ մարտ վարել մինչև վերջին փամփուշտը։ Մերժելով գերի հանձնվելու հակառակորդի առաջարկը՝  Վահագն  Վարդևանյանն իր մոտ եղած նռնակով պայթեցրել է իրեն և մոտեցող թշնամու 4 զինվորներին։

«Ես հպարտություն եմ զգում, քանի որ  այստեղ սովորող աշակերտներն այսօրվանից  Վահագնի մասին ավելի շատ բան  կիմանան ու կծանոթանան նրա հերոսությանը»,- ասում է հայրը:

Արմենակ Խանփերյանցի անվան ռազմական համալսարանի դասախոս Սասուն Աբրահամյանը նույնպես  պատերազմի մասնակից է: Վահագնին անձամբ է ճանաչել, ճանաչել է նրա մարդ ու զինվոր տեսակը. «Ես՝ որպես պատերազմի վետերան, անչափ ուրախ եմ, որ նման գրքեր են հրատարակվում, որ նոր սերունդը մեր հերոսներին ճանաչելու հնարավորություն ունի:  Իմ երեխաներն  այս դպրոցում են սովորել, հիմա էլ այստեղ են սովորում թոռներս: Բոլորը պետք է ճանաչեն մեր հերոսներին»:

Վահագն Վարդևանյանն ու նրա 13 զինվորները խաղաղ ննջում են «Եռաբլրում»… Վարդևանյանը հետմահու արժանացել է «Արցախի հերոս» բարձրագույն կոչմանը: Նրա անունն է կրում Երևանի թիվ 173 դպրոցը, որտեղ տեղադրված է նաև նրա կիսանդրին, բացված է փառքի սենյակ։ Հենց այդ սենյակում էլ մշտապես իրենց տեղը կգրավեն հոր` Վահագնին նվիրված գրքերը:

Լաուրա Մամյան