ՇՆՈՐՀԱՎՈՐ ՏՈՆԴ, ՀԱՅՈ՛Ց ԲԱՆԱԿ

«Շնորհավոր  տոնդ, Հայոց  բանակ, հաղթության  ու  արիության  բանակ».  այս  խորագիրն  էր  կրում  ՀՀ  Արագածոտնի  մարզի  Հնաբերդի  Երվանդ Պետրոսյանի  անվան  միջնակարգ  դպրոցում  անցկացված  հերթական  միջոցառումը`   նվիրված   հայոց  բանակի  28-ամյակին: Գեղեցիկ  ձևավորված  դասասենյակը  տոնական  տրամադրություն  էր  հաղորդել  միջոցառման  բոլոր  մասնակիցներին`  աշակերտներին, ուսուցիչներին, ծնողներին: Ներկաներին  ողջունեց  և  տոնի  առթիվ  շնորհավորեց  դպրոցի  տնօրենը` Նելսիդա Նիկողոսյանը: 10-րդ  և  11-րդ  դասարանի  աշակերտներն  իրենց  գեղեցիկ  ասմունքով, երգուպարով, տպավորիչ փոքրիկ  բեմականացումներով  գերեցին  միջոցառման մասնակիցներին:

Մի  դրվագում  որդուն  բանակ ճանապարհող մայրն էր. «Գնա՛, որդի՛ս, որ  հայ  փոքրիկը  խաղաղ ու անվրդով քնի»:

Հաջորդ  դրվագում  աղջիկը  ծաղիկներին  է  պատմում  իր  սիրո  պատմությունը.

«Գիտեք, լույս  ծաղիկներ, իմ  սիրելին  գնաց, նա կռվի  դաշտ  գնաց  սերը  սրտում: Մեկնելուց  առաջ  նա  խոստացավ վերադառնալ»:

Մեկ  այլ  դրվագում  կռվի  դաշտում  վիրավորված  զինվորը  նամակ  է  թելադրում  բուժքրոջը (դերակատար`  Քաջիկ  Խաչատրյան, Քրիստինա  Վարդանյան): Վերջապես  զինվորը հաղթանակած տուն  է  վերադառնում, նրան  դիմավորում է  սիրած  աղջիկը` ծաղիկներով. «Հաղթանակը  քեզ  ինձ  բերեց, իմ սեր, իմ  կյանք…»:

Հնգամյա Սոնա Նիկողոսյանը  տիկնիկը  գրկին  մոտենում  է  զինվորին  ու  շշնջում.

«Քեռի՛, չունեմ  ես  հայր. զոհվել է  նա  Բերձորն ազատագրելիս: Ես  տիկնիկիս  ու  ինձ  համար Խաղաղություն  եմ  ուզում….»:

Զինվորը  գրկում  է  նրան. «Խաղաղության մեջ ապրես, սիրելի՛ փոքրիկ: Խաղաղություն  ամենքին  ու  ամենուր: Այդ  ենք  միայն  մենք  աշխարհին  կամենում…»:

Տեսարանն   այնքան  հուզիչ  էր, որ  ես ու  ինձ  նման  մի  քանի  ծնողներ, որոնք նոր  էին  բանակ ճանապարհել  իրենց  զավակներին, չկարողացան  զսպել  իրենց  արցունքները: Ես` որպես զինվորի  մայր, հպարտություն ապրեցի,  որ  որդի  ունեմ Հայոց փառապանծ  բանակում: Թող  Աստծո  աջը  պաշտպան  լինի  մեր  զինվորներին: Մեզ  մնում  է  միայն  աղոթել ու  սպասել  նրանց  վերադարձին:

Եվ  իհարկե, չեմ  կարող  իմ երախտիքի  խոսքը  չասել միջոցառման  կազմակերպչին`  Կարմեն Ներսիսյանին, բովանդակալից  ու  գեղեցիկ  միջոցառման համար: Ի դեպ, նրա որդին էլ՝ Գևորգ Ղազարյանը, սովորում  է Սպարապետ Վազգեն Սարգսյանի  անվան  ռազմական  համալսարանում:

Արմենուհի Հակոբյան

Զինվորի մայր