ԵՌԱԲԼՈՒՐ

Այս քաղաքում հարսներն են

Ծաղիկներ բերում սիրեցյալներին,

Եվ փեսացուները

Ժպտում են փակ աչքերով:

Այս քաղաքում երգերը համրաձայն են,

Աղոթքն արցունքոտ,

Եվ խոստումները` հավերժ:

Այս քաղաքում բոլորը

Ծեր են մի գարուն հետո,

Ու երջանիկ են՝ մի աշուն առաջ…

***

Այս քաղաքում զավակները ՆԿԱՐ են,

…Եվ մայրերը՝ ՀԵՐՈՍ…

***

Այս քաղաքում հիշողությունն Աստված է,

Իսկ Աստված՝ թևաթափ,

Իսկ Աստված ծնրադիր՝

Խնկաբույր ՔԱՐԵՐԻՆ….

***

Վարդերը չեն բուրում

Պատերազմից հետո:

Վարդերը թոշնում են

Շիրմաքարերին…

ԱՂԱՎՆԻ ԳՐԻԳՈՐՅԱՆ

Գրող, թարգմանիչ

Մադրիդ, Իսպանիա