Հայ զինվոր

ՍԻՐՈ՞ՒՄ ԵՔ «ՁԵԶ ՑՈՒՅՑ ՏԱԼ»

Այս թեստը մշակվել է 2009 թվականին «Հոգեբանական թեստերի մշակման մոսկովյան լաբորատորիայի» կողմից: Որպես ինքնարտահայտման ստուգման հուսալի մեթոդ` արտոնագրված է GNU (General public License` ընդհանուր հանրային արտոնագիր) FDL-ի (Free documental license` ազատ փաստաթղթերի արտոնագիր) կողմից: Այս թեստի նպատակն է արտածել «դեմոնստրատիվության» մակարդակը. դա բարդ, բազմակողմանի որակ է, որի էությունը սեփական անձի հանդեպ դրական ուշադրությունից գերհաճույք ստանալն է և այն քայլերը, որոնք ուղղված են այդ ուշադրության պահպանմանը:

ՈՒՇԱԴՐՈՒԹՅՈՒՆ

1. Թեստը նախատեսված է ինքնաստուգման համար և նպատակ ունի նպաստելու միմիայն անհատի ինքնաբացահայտմանն ու ինքնաճանաչմանը: Չի կարելի այն լրացնել մեկ ուրիշի հետ, կամ, առավել ևս, ուրիշի փոխարեն, քանի որ նման դեպքերում ճիշտ արդյունք չի ստացվի:

2. Հիշեք, որ թեստի արդյունքները չեն կարող մեկնաբանվել միանշանակորեն:

Յուրաքանչյուր հարցին պատասխանեք «այո» կամ «ոչ»: Որպես կանոն` Ձեզ համար ամենաբնորոշը մտքին եկած առաջին պատասխանն է:

1. Լինո՞ւմ են անհանգստության այնպիսի շրջափուլեր, երբ չեք կարողանում տեղում նստել:

2. Հաճա՞խ եք այնպիսի զգացում ունենում, կարծես ինչ-որ բան վատ կամ սխալ եք արել:

3. Ընկերախմբում ուշադության կենտրոնո՞ւմ եք լինում:

4. Պատահե՞լ են այնպիսի կոնֆլիկտներ կամ տհաճություններ, որոնցից նյարդայնացած` աշխատանքի կամ նախապես ծրագրված այլ վայր չեք գնացել:

5. Կարելի՞ է ասել, որ Ձեր առօրյա կյանքում շատ հետաքրքրություններ կան:

6. Ոգևորությամբ կզբաղվեի՞ք գեղարվեստական կամ գուցե թատերական որևէ գործով:

7. Ձեզ համար միևնո՞ւյնն է, թե մարդիկ Ձեր մասին ինչ են մտածում:

8. Ձեզ հաճախակի անհանգստացնո՞ւմ են սրտխառնոցը կամ նմանատիպ զգացողությունները:

9. Դուք մի՞շտ եք նույն չափով հոգատար Ձեր մտերիմների հանդեպ:

10. Հազվադե՞պ եք գլխացավ ունենում:

11. Կարո՞ղ եք մարդկանց հետ հարաբերություններում ծածկամիտ լինել` թաքցնելով Ձեր իրական վերաբերմունքը նրանց հանդեպ:

12. Դժվարությա՞մբ եք զրույց վարում այն մարդու հետ, ում դեռ նոր եք ճանաչում:

13. Մի՞շտ եք հետևողական և նպատակասլաց Ձեր գործունեության մեջ:

14. Կարծո՞ւմ եք, որ Ձեր ընտանեկան կյանքն ավելի վատը չէ, քան ձեր ծանոթներից շատերինը:

15. Պատահո՞ւմ է, որ պարզապես վիճելու ցանկություն եք ունենում:

16. Ձեր ախորժակը տե՞ղն է:

17. Հեշտությամբ կարո՞ղ եք Ձեր ուշադրությունը ցրել մտահոգող խնդիրներից:

18. Ըստ Ձեզ` շա՞տ եք ամաչկոտ:

19. Վերջերս Ձեր ինքնազգացողությունը հիմնականում լա՞վ է եղել:

20. Ձեզ համար դժվա՞ր է բազմաթիվ հանդիսատեսների առաջ հանդես գալ բեմի վրա:

21. Հաճա՞խ եք ուժեղ սրտխփոց զգում:

22. Ուրիշներից ավելի՞ եք դժվարանում կենտրոնանալ:

23. Հաճա՞խ է պատահում, որ չեք հասկանում ձեր անտրամադիր կամ նյարդային լինելու պատճառը:

24. Կարելի՞ է ասել, որ ձեզ երբեք ավելի լավ չեք զգացել, քան հիմա:

25. Հնարավո՞ր է, որ թատերական բեմադրության մասնակցելիս ամբողջովին մտնեք դերի մեջ և մոռանաք ինքներդ Ձեզ:

26. Կարո՞ղ եք հեշտությամբ հարմարվել նոր իրավիճակին:

27. Առավոտյան սովորաբար զգո՞ւմ եք, որ նորմալ եք քնել և հանգստացել:

28. Հեշտությա՞մբ եք չափածո տողեր հորինում:

29. Ըստ Ձեզ` շատ մարդիկ չափազանցնո՞ւմ են իրենց դժբախտությունները, որպեսզի կարեկցանք և օգնություն ստանան:

30. Ձեր տեսողությունը վերջին շրջանում վատացե՞լ է:

31. Բռնկո՞ւն եք:

32. Ձեզ համար դժվա՞ր է խղճահարություն առաջացնել Ձեր նկատմամբ, նույնիսկ եթե իսկապես շատ վատ եք զգում:

33. Հաճա՞խ եք ընդհանուր թուլություն զգում:

34. Սովորաբար գո՞հ եք Ձեր բախտից:

35. Հակվա՞ծ եք ներքին խռովքի, անհանգստության, բուռն ձգտումների:

36. Կարո՞ղ եք այնքան հուզական և «կենդանի» պատմել ամենաձանձրալի պատմությունը, որ Ձեզ ուշադիր լսեն:

Արդյունքների մշակում

Հետևյալ հարցերից յուրաքանչյուրի «այո» պատասխանը գնահատեք 1 միավոր` 1, 2, 3, 4, 6, 8, 9, 11, 13, 17, 21, 22, 25, 26, 28, 30, 33, 35, 36:

Հետևյալ հարցերից յուրաքանչյուրի «ոչ» պատասխանը գնահատեք 1 միավոր` 5, 7, 10, 12, 14, 15, 16, 18, 19, 20, 23, 24, 27, 29, 31, 32, 34:

Հաշվեք գումարը:

0-7 միավոր- Դեմոնստրատիվության ցածր մակարդակ: Դուք ինքնարտահայտվելու որոշակի խնդիրներ ունեք, երբեմն շատ եք կենտրոնանում բացասական ապրումների վրա: Շփման մեջ այդքան էլ հուզական չեք: Առհասարակ չեք ձգտում նշանակալի երևալու, կամ էլ, օրինակ, այն բանին, որ Ձեզանով հիանան: Ձեզ համար կարևոր են փաստերը:

8-16 միավոր – Դեմոնստրատիվության միջին, նորմալ մակարդակ: Ինքնարտահայտման հետ կապված խնդիրներ չունեք: Հակված չեք բացասական ապրումների արտահայտմանը, բայց և չեք կենտրոնանում դրանց վրա: Այլ մարդկանց հետ այդքան էլ արագ լեզու չեք գտնում, բայց երբեք սոցիալական մեկուսացման մեջ չեք հայտնվում: Շփվելիս դրսևորում եք հուզականության նորմալ չափ:

7-29 միավոր – Դեմոնստրատիվության բարձր մակարդակ: Արտիստիզմ և հակվածություն թատերային էֆեկտների: Բացասական ապրումները հեշտությամբ արտահայտում եք, հաճախ մերժում եք ակնհայտ փաստերը` գերադասելով հիմնվել զուտ զգացմունքների վրա: Շփման մեջ շատ հուզական եք: Երբեմն հակված եք պատասխանատվությունից խուսափելուն:

30-36 միավոր – Դեմոնստրատիվության շատ բարձր մակարդակ: Արտիստիզմը Ձեր վառ երևակայության հետ զուգակցվելով` շատ հաճախ միջանձնային փոխհարաբերություններում խնդիրներ է հարուցում հենց Ձեզ համար: Այն, ինչ ռացիոնալ է և գործնական, Դուք հակված չեք քննարկելու: Ձեզ կարելի է հեշտությամբ ինչ-որ բան համոզել` միայն Ձեր հանդեպ հաճելի վերաբերմունք ցուցաբերելով: Դուք դժվարությամբ եք ընկալում մերժման ցանկացած տեսակ: Ձեզ համար առաջնային է ամեն ինչում կատարելության հասնելը և որ առավել կարևոր է` դրա համար ուրիշների հիացմունքին և գնահատականին արժանանալը:

ԱՆԻ ՄԱՐԳԱՐՅԱՆ