ՆՇԱՆԱԿՎԵԼ Է ԲԵԼԱՌՈՒՍԻ ԵՎ ՌԴ-Ի ՀԱՄԱՏԵՂ ՀՕՊ ՀԱՄԱԿԱՐԳԻ ՀՐԱՄԱՆԱՏԱՐ

Ռուսաստանի և Բելառուսի Միացյալ տարածաշրջանային ՀՕՊ համակարգի հրամանատար է նշանակվել գեներալ-մայոր Օլեգ Դվիգալևը։ Այս մասին օգոստոսի 27-ին հրավիրված մամուլի ասուլիսում հայտարարել է Բելառուսի պաշտպանության նախարար Յուրի Ժադոբինը։

«Միացյալ տարածաշրջանային ՀՕՊ համակարգի հրամանատարին նշանակում են Ռուսաստանի և Բելառուսի նախագահները` համատեղ համաձայնությամբ»,-հայտարարել է Բելառուսի պաշտպանության նախարարը։

Ռուսաստանն ու Բելառուսը դեռ 90-ական թվականներից բանակցություններ էին վարում համատեղ ՀՕՊ համակարգ ստեղծելու ուղղությամբ։ Այնուհետեւ ՌԴ և Բելառուսի պաշտպանության նախարարները 2009 թվականին ստորագրել էին միացյալ տարածաշրջանային ՀՕՊ համակարգ ստեղծելու համաձայնագիր, որը Բելառուսի նախագահ Ալեքսանդր Լուկաշենկոն վավերացրել է 2012 թվականին։

Համատեղ ՀՕՊ համակարգի կյանքի կոչելը ձգձգվում էր այն պատճառով, որ պաշտոնական Մինսկն ինքն էր ցանկանում ղեկավարել համակարգը։