ՇՏԱԲԱՅԻՆ ՄԱՐԶՈՒՄՆԵՐ

Ըստ պատրաստության պլանի՝ 1-ին բանակային զորամիավորումում անցկացվեցին շտաբային մարզումներ, որոնցում ներգրավված էին զորամիավորման և ենթակա զորամասերի հրամանատարությունը, վարչակազմերն ու շտաբները: Մարզումների նպատակը վերջերս տեղի ունեցած հրամանատարաշտաբային զորավարժության արդյունքների հիման վրա նոր խնդիրների առաջադրումն էր, սպաների մասնագիտական գիտելիքների և ունակությունների  կատարելագործումը, ինչպես նաև շտաբների փոխգործակցության ապահովումը: Զորամիավորման ենթակա զորամասերից մեկում քարտեզներով աշխատանքից հետո տարբեր օղակների հրամանատարները, զորավարժությունում ընդգրկված պատասխանատուները տեղանքի մանրակերտի վրա ներկայացրին իրենց ծառայությունների և ստորաբաժանումների գործողությունները հնարավոր իրավիճակների զարգացման դեպքում:

Շտաբային մարզումներին հետևում էր ՀՀ ԶՈՒ ԳՇ պետի տեղակալ, գեներալ-մայոր Օնիկ Գասպարյանը, որն էլ իր դիտարկումները ներկայացրեց սպաների մասնագիտական հետագա կատարելագործման վերաբերյալ:

ՎԱՉԵ ՄԿՐՏՉՅԱՆ

1-ին ԲԶ թղթակցական կետ