ԱՅՑԵԼՈՒԹՅՈՒՆ ԶՈՐԱՄԱՍԵՐ

Օրերս 5-րդ զորամիավորման զորամասերում կազմակերպվել են  տարաբնույթ միջոցառումներ. զինծառայողների ընտանիքների անդամների այցելություններ զորամասեր, մրցույթներ  ընտանիքների անդամների մասնակցությամբ,  մշակութաժամանցային տարբեր միջոցառումներ:

Առանց բացառության բոլոր զորամասերում միջոցառումներն անցել են բարձր կազմակերպվածությամբ, ուրախ եւ մրցակցության ակտիվ ոգով, գունդը կարծես թե վերածվել էր մի մեծ ընտանիքի:

Այդ օրը զորամաս էին այցելել 3-15 տարեկան երեք տասնյակից ավելի զինծառայողների երեխաներ, ինչպես նաեւ սպաների եւ ենթասպաների կանայք:

Նախ զինծառայողների ընտանիքները ծանոթացան հայրիկների եւ մայրիկների ծառայության պայմաններին, այնուհետեւ կրակեցին հրաձգային զենքերից, իսկ  պարտադիր ժամկետային զինծառայողների հետ հանդիպման ժամանակ յուրաքանչյուրը ցուցադրեց իր ունակությունը՝ բանաստեղծություններ եւ երգեր նվիրելով հայ զինվորներին:

Հաճելի էր հատկապես երեխաների հետաքրքրությունը զենքերի նկատմամբ, յուրաքանչյուրը ցանկանում էր նկարվել հայ զինվորի հագուկապով: Միջոցառման երկրորդ փուլում կազմակերպվեց մրցույթ ընտանիքի անդամների միջեւ, հաղթողները խրախուսվեցին պատվոգրերով եւ շնորհակալագրերով: Երեխաները իրենց ակտիվությամբ բարձր տրամադրություն հաղորդեցին զորամասին եւ ապահովեցին տոնական բարձր տրամադրությունը:

 5-ՐԴ ԶՈՐԱՄԻԱՎՈՐՄԱՆ ԹՂԹԱԿՑԱԿԱՆ ԿԵՏ