Հայ զինվոր

ԶԻՆՎՈՐԻ ՆԱՄԱԿԸ

ՀՀ զինված ուժերի զորամասերից սփյուռքի 25 պետություններում ապրող 74 ուսումնական հաստատությունների սաներին ուղղվել է 1271 նամակ: Առաջիկա մի քանի համարներում կտպագրենք դրանցից մի քանիսը:

Բարեւ, սիրելի՛ Մարիա ջան, քո նամակին պատասխանում է գումարտակից սերժանտ Հարթենյան Արտյոմը: Սիրելի՛ Մարիա, ես շատ ուրախ եմ, որ քո բարեմաղթանքներին ես եմ պատասխանելու:

Սիրելի՛ Մարիա, մենք այստեղ հսկում ենք մեր սահմանները, որպեսզի մեր մայրերը, հայրերը, մեր բոլոր հարազատները, ինչպես նաեւ` ամբողջ հայ ժողովուրդը հանգիստ կարողանա գլուխը դնել բարձին: Ես շատ հպարտ եմ, որ իմ հայրենիքի սահմանն եմ հսկում: Ես շատ ուրախ եմ, որ դո՛ւ, սիրելի Մարիա, մեզ հիշել ես Իսպանիայից եւ մտածում ես մեր մասին ու անհանգստանում մեզ համար: Մարիա ջան, Հայաստանը պաշտպանելը այդքան էլ հեշտ չէ, բայց մեր խիզախ զինծառայողների, գրագետ սպաների շնորհիվ մեր երկիրը հիմա շատ հզոր բանակ ունի: Մարիա ջան, եթե մի օր այցելես Հայաստան, անպայման մեզ հյուր արի եւ կհամոզվես, թե ինչ ամուր եւ հզոր բանակ ունենք:

Շնորհակալություն՝ մեզ հիշելու համար:

***

Զինվոր եմ, երկու ամսից կզորացրվեմ: Քսաներկու ամսում տեսել եմ հնարավոր ամեն դժվարություն, սակայն այդ ամենը մնացել են եւ կմնան իմ հաջողությունների եւ ձեռքբերումների ստվերում:

Պատվով կրում եմ համազգեստս եւ գիտեմ, որ «դրսում» ինձնով հպարտանում են ծնողներս, սիրածս աղջիկը… Արձակուրդ եկած ժամանակ իմ քաղաք Երեւանում շրջել եմ համազգեստով, որպեսզի զգամ այն ջերմությունը, որը ժողովուրդը տածում է հայ զինվորի նկատմամբ:

Նայե՛ք մեզ, ամենքս հասարակ երիտասարդներ ենք. մեկս` խելացի, մեկս` ժիր, մեկը` համեստ, մյուսը` հումորով, մյուսը` ուժեղ… Ճակատագրական ու բախտորոշ պահերին նման տղերքին է վիճակված մարտիրոսվելու ու իրենց կյանքի գնով ապրեցնելու կյանքեր:

Ինչ էլ լինի, ինչ գնով էլ լինի, ինչ մարդկային կյանքերով էլ լինի, մենք` զինվորներս, առաջինն ենք կասեցնելու ոսոխի առաջխաղացումը եւ այն հողը, ուր թափվել է մեզ նման տղերքի արյունը, երբեք ու երբեք թշնամին ոտնակոխ չի անի…