ԿԻՐԱԿՆՕՐՅԱ ՄԻՋՈՑԱՌՈՒՄՆԵՐ 1-ԻՆ ԶՈՐԱՄԻԱՎՈՐՈՒՄՈՒՄ

Ինչպես ողջ Ազգային բանակում, այնպես էլ գնդապետ Արարատ Մելքումյանի հրամանատարությամբ գործող զորամիավորումում  կարևորվում է կիրակնօրյա միջոցառումների  շրջանակներում ցուցադրական պարապմունքների անցկացումը:

Միջոցառումներն սկսվեցին ռազմահայրենասիրական թեմայով զրույցով` նվիրված Սպարապետ Վազգեն Սարգսյանի ծննդյան օրվան: Դասընթացը վարող ստորաբաժանման հրամանատար սպան ներկայացրեց Սպարապետի կյանքի ու գործունեության մասին ուշագրավ դրվագներ, որոնք ուղեկցվեցին բանակաշինության գործում Սպարապետի ունեցած մեծ դերակատարության մասին հարցուպատասխաններով:

Այնուհետև անձնակազմը շարվեց շարահրապարակում, որի ժամանակ հայտարարվեց կիրակնօրյա միջոցառումների  մարզական ուղղվածության մասին: Անցկացվեցին ցուցադրական պարապմունքներ: Բացազատվեցին ուսումնական կետեր: Հաշված րոպեների ընթացքում զորամասի ողջ տարածքը վերածվեց  մարզական փոքրիկ ավանի, որտեղ տարբեր ուսումնական կետերում անզիջում մրցապայքարի մեջ մտած թիմերից կամ անհատ մասնակիցներից յուրաքանչյուրն ուզում էր վաստակել հաղթանակի դափնին: Հարյուրավոր ժամկետային զինծառայողներ մրցակցային մթնոլորտում  իրենց ուժերը փորձեցին  զորամասի  մարզական ավանում, շարահրապարակում, զորանոցի հարակից տարածքում: Կշռաքարերի բարձրացում, բազկամարտ, վազք, ձգումներ պտտաձողի վրա, սեղանի թենիս, շաշկի, շախմատ, պարանի ձգում, ֆուտբոլ, վոլեյբոլ մարզաձևերից անցկացվեցին անհատական և թիմային մրցումներ:

Բացազատված տեղամասերից մեկում անցկացվեց «զենքի ոչ լրիվ քանդում–հավաքում» մրցույթը, վարժ ու գերազանց կատարեցին և մրցանակային տեղեր գրավեցին շարքայիններ` Ռուստամյանը, Քլոյանը, Ոսկանյանը:

Իրենց զինակից «չեմպիոն» ընկերներից ոչնչով ետ չմնացին մյուս հաղթողները՝  սերժանտներ Ռոբերտ Պետրոսյանը, Ռոբերտ Հակոբյանը, շարքայիններ` Վահան Եղիազարյանը, Արթուր Մարտիրոսյանը, Ալեքսան Պետրոսյանը, Տիգրան Ղազարյանը, Ռոմիկ Սարգսյանը: Թիմային մրցումներում պարզ դարձավ, որ ստորաբաժանումները  համախմբված կարողանում են համոզիչ հաղթանակ տանել՝ պարանի ձգում, ֆուտբոլ, վոլեյբոլ մարզաձևերից: Հաղթեցին երեք տարբեր դիվիզիոններ:

Օրվա վերջում շարահրապարակում տեղի ունեցավ կիրակնօրյա միջոցառումների  արդյունքների ամփոփում, որի ժամանակ մրցանակային տեղեր զբաղեցրած զինվորները զորամիավորման հրամանատարի ԱՀՏԱ գծով տեղակալ, գնդապետ Ա. Թումանյանի, զորամիավորման ֆիզպատրաստության և սպորտի ծառայության պետ, մայոր Մանվելյանի, զորամասի հրամանատարի ԱՀՏԱ գծով տեղակալ, փոխգնդապետ Ա. Մարտիրոսյանի, զորամասի ֆիզպատրաստության և սպորտի պետ, մայոր Հ. Այվազյանի կողմից արժանացան շնորհակալության, պատվոգրերի, կրծքանշանների:

Գնդապետ Արարատ Մելքումյանի հրամանատարությամբ գործող զորամիավորումում կիրակնօրյա  միջոցառումների շրջանակներում անցկացված ռազմահայրենասիրական թեմայով զրույցներն ու մարզական ցուցադրական պարապմունքները ցույց տվեցին, որ մեր զինվորները խելացի են, գիտակից, գաղափարապես պատրաստված, հոգեպես և ֆիզիկապես առողջ ու կոփված: 

ՎԱՉԵ ՄԿՐՏՉՅԱՆ

1-ին զորամիավորման թղթակցական կետ