«ՆԿԱՐԵԼ ԵՄ ԱՍՏԾՈՒՆ, ՈՐ ՄԵՐ ԵՐԿՐԻՆ ԽԱՂԱՂՈՒԹՅՈՒՆ ՊԱՐԳԵՎԻ»

ՀՀ ՊՆ Ձմեռ պապին՝ զեկուցագիր նամակ.

Ձեզ եմ ուղարկում 2022 թվականի իմ ցանկությունները. ինքնաձիգ ԱԿՄ, կապի միջոցներ, խաղաղություն:

Զեկուցող՝ Նարեկ Հովսեփյան

Նամակը ձեռքում պինդ պահած  տասնամյա Նարեկը եկել էր  պաշտպանության նախարարություն: Տրամաբանական հարց է  առաջանում՝ ինչո՞ւ պաշտպանության նախարարություն: Հարցի պատասխանն էլ հենց այս պատմության առանցքն է, որն սկիզբ է առնում Նարեկի ցանկություններն իր մեջ ամփոփող նամակ-զեկուցագրի բովանդակությունից:

Նամակում նշված երեք կետերին տեղում ևս մեկն ավելացավ. Նարեկի խնդրանքով ու ցանկությամբ նրան ներկայացրինք «Զինուժ» հաղորդաշարի պատրաստման ընթացքը, նկարահանման տաղավարները, պատասխանեցինք զինվորական դառնալու մեծ երազանք ունեցող տղեկի հարցերին:

Նարեկի խոսքով՝ նամակը գրելու միտքը ծնվել է հանկարծակի, երբ վերջերս դպրոցից տուն վերադառնալիս լսել է իրենց բնակավայրի ուղղությամբ հակառակորդի արձակած կրակոցների ձայնը, իսկ համացանցում էլ աչքով են ընկել այդ մասին տեսանյութերն ու հրապարակումները։

Ի դեպ, պատահական չէ նաև Աստծո պատկերով նամակի ու ծրարի նկարազարդումը։

-Նկարել եմ Աստծուն, որ մեր երկրին խաղաղություն պարգևի,- ասաց Նարեկը:

Պաշտպանության նախարարությունում Նարեկը հանդիպեց նախարար Սուրեն Պապիկյանին: Ընդունելով սահմանամերձ բնակավայրի փոքրիկ բնակչին՝ նախարարն ասաց.

-Նարե՛կ ջան, շատ կարևոր է, որ մենք բոլորս՝ մեր Հայրենիքի զինվորներս ապահովենք մեր երկրի խաղաղությունը, տարածաշրջանի խաղաղությունը: Քո նամակի՝ ինքնաձիգի, կապի միջոցների և ամենակարևորը՝ խաղաղության անհրաժեշտությունը շատ կարևոր ուղերձ է բոլորիս, և մենք հաշվի առնելով քո սրտի ցանկությունը՝ կազմակերպեցինք այս հանդիպումը:

Իսկական ինքնաձիգն ու ռազմական կապի միջոցները՝ հասուն տարիքում, իսկ Ամանորի առթիվ մենք քեզ կնվիրենք պլանշետ և զինվորական համազգեստ։

-Չգիտեի, որ կհանդիպեմ պաշտպանության նախարար Սուրեն Պապիկյանին, որ հանդիպումն այսքան լավ կանցնի, շատ ուրախ կանցնի,- ասաց փոքրիկ զինվորը:

Ուրախ տրամադրությամբ ու ոգևորությամբ էլ Նարեկը հեռացավ պաշտպանության նախարարությունից՝ մի օր հաստատ իր երազանքը ի կատար ածելու՝ ուսադիրներով  զինվորական համազգեստ կրելու և Հայրենիքի  պաշտպան դառնալու վստահությամբ:

ՀՈՎՀԱՆՆԵՍ ՊԱՌԱՇՅԱՆ

Լուսանկարները՝ ՍԻՓԱՆ ԳՅՈՒԼՈՒՄՅԱՆԻ