ՀՀ պաշտպանության նախարարի հրամանով՝ պաշտպանության նախարարին առընթեր հասարակական խորհրդի հովանու ներքո ստեղծվել է 2013թ. գարնանային զորակոչի ընթացքում քաղաքացիների դիմումների եւ բողոքների քննարկման հանձնաժողով: Հանձնաժողովի նախագահ է նշանակվել հասարակական խորհրդի նախագահ, պաշտպանության նախարարի խորհրդական Գեղամ Հարությունյանը: Հանձնաժողովի նիստերը տեղի են ունենում Մոսկովյան 5 հասցեում տեղակայված հասարակական խորհրդի աշխատավայրում, յուրաքանչյուր երկուշաբթի եւ հինգշաբթի օրերին, ժամը 11:00-ից – 16:00-ը: Դիմում բողոքներն ընդունվում են շաբաթվա բոլոր աշխատանքային օրերին` հասարակական խորհրդի աշխատավայրում:
Հունիսի 6-ին հանձնաժողովի առաջին նիստն էր:

Արցախյան գոյամարտում մեր ժողովրդի հազարավոր քաջորդիների արյան գնով կայացավ հաղթանակը, ու հաստատվեց խաղաղությունը: Արցախում և Մայր Հայաստանում չկա որևէ բնակավայր, որ չունենա թանկ կորուստ: Ասկերանի շրջանի Պատարա գյուղում, ճիշտ է, պատերազմական գործողություններ չծավալվեցին, սակայն 155 տեղացի տղաներ մարտի ելան՝ հայրենի Արցախի պաշտպանության ու ազատության համար: Շատերը տուն դարձան հաղթանակած, իսկ 22-ը, որպես հավերժի ճամփորդներ, իրենց արյամբ սրբացրին մայր հողը:

Անհնար է թերագնահատել կնոջ դերը հասարակական-քաղաքական կյանքում և հայ ընտանիքում առհասարակ: Հայ մայրերն են, որ իրենց երեխաներին մանուկ հասակից պետք է սեր եւ նվիրում ներշնչեն հայրենիքի, բանակի հանդեպ:
Ուստի եւ հաշվի առնելով կանանց եւ աղջիկների յուրահատուկ դերը մատաղ սերնդի դաստիարակության գործում` վերջերս մայրաքաղաքի N 105 դպրոցում կազմակերպվեց օդամղիչ հրացաններից հրաձգության մրցույթ աղջիկների համար, որը ավանդական դարձնելու մտադրություն է նկատվում:

Զոհված ազատամարտիկների ընտանիքներին միավորող «Կարոտի կանչ» բարեգործական-հասարակական կազմակերպությունը մայիսյան եռատոնի շրջանակներում այցելել էր Արցախ: Միջոցառման մասնակիցները եղան նախ Լաչինի, ապա նաև Ստեփանակերտի պանթեոններում և իրենց հարգանքի տուրքը մատուցեցին գոյամարտի զոհերի հիշատակին: Արցախի վեհացնող բնությունը և այցելությունը պատմամշակութային վայրեր, հատկապես` Գանձասար, յուրահատուկ զգացումներ էր արթնացրել միջոցառման մասնակիցների սրտերում. տեսնելով իրենց հերոս զավակների շնորհիվ ազատագրված հայոց հինավուրց հողի այս պատառիկն ու նրա սրբավայրերը` նրանք հոգեկան ամոքման պահեր էին ապրում:

ՀՀ ՊՆ վարչական համալիրում մայիսի 29-ին մեկնարկած «Ռազմական հոգեբանության հիմնախնդիրները» թեմայով երկօրյա գիտաժողովի ընթացքում քննարկվեցին ռազմական հոգեբանության խնդիրները: Գիտաժողովի կազմակերպիչներն էին Երևանի պետական բժշկական համալսարանը, ՀՀ պաշտպանության նախարարին առընթեր Հասարակական խորհուրդը և Պետական կառավարման ակադեմիան: Հասարակական խորհրդի նախագահ Գեղամ Հարությունյանը նշեց, որ գիտաժողովի նպատակն է համախմբել ռազմական հոգեբանության հիմնախնդիրներով զբաղվող մասնագետների գիտական ներուժը եւ գործնականորեն կիրառել ոլորտի կայացման աշխատանքներում:

Հարգելի՛ խմբագրություն, ձեր միջոցով շնորհավորում ենք Սարգիս Հովհաննիսյանի ծննդյան տարեդարձը:
– Սարգիս ջան, ցանկանում ենք քեզ քաջառողջություն, անկոտրում կամք, բոլոր լուսավոր երազանքների իրականացում: Վստահ ենք, որ այսուհետ ևս կծառայես արժանապատվությամբ, ինչպես վայել է հայ զինվորին:

Շարունակվում է զորակոչիկների ու նրանց ծնողների համար ՀՀ ՊՆ և Զարգացման ծրագրերի հայկական կենտրոնի կազմակերպած և իրականացվող իրավախորհրդատվական միջոցառումների շարքը։ Հերթական հանդիպման վայրը Իջևան քաղաքն էր, որտեղ հանդիպումը անցավ լեփ-լեցուն դահլիճում, ինչը վկայում էր, որ շրջանի զորակոչի պատասխանատու կառույցները, ի դեմս շրջանի զինկոմիսարիատի, բնակչության հետ բացատրական աշխատանք էին կատարել միջոցառման դերն ու նշանակությունը կարևորելու համար։