Ռուսաստանի պաշտպանության նախարարությունը պատրաստվում է լրավճարներ սահմանել դիպուկահարների պատրաստություն իրականացնող քաղաքացիական մասնագետների համար: Ամենամսյա լրավճարը կկազմի մոտ 40 000 ռուբլի: Գումարը կստանան դիպուկահարների մասնագիտացված դպրոցների և վերապատրաստման դասընթացների մեթոդիստները, դասախոսները, հրահանգիչները, ինչը թույլ կտա զինված ուժերի համար անհրաժեշտ մասնագետներ ապահովել քաղաքացիական և զորացրված զինծառայողների կազմից:

Իսրայելական ընկերություններից մեկը ներկայացրել է ձեռքի նռնակի տեսքով պատրաստված ռադիոխանգարումների գեներատոր, որը նախատեսված է ռադիոպայթուցիչները, այդ թվում՝ ինքնաշեն պայթուցիկ սարքերը փակելու համար: Ուսումնասիրելով մարտական գործողությունների վարման տարբեր դրվագներ` նոր զինամթերքի ստեղծողները պարզել են, որ հաճախ մեծ վտանգ են ներկայացնում չուսումնասիրված շինությունները, կայանված ավտոմեքենաները և այլն, քանի որ դրանցում հաճախ ռումբեր են տեղադրված լինում:

Ամերիկյան Raytheon ընկերությունը ցուցադրել է ավիառումբերի կառավարման Enhanced Paveway II անլար տեխնոլոգիան: Այն թույլ է տալիս սովորական ավիառումբերը դարձնել կառավարելի տեղադրվող անլար ընդունիչի և օդաչուի խցիկում գտնվող հաղորդիչի միջոցով: WiPAK անվանումը ստացած տեխնոլոգիան ունիվերսալ է և կարող է տեղադրվել ցանկացած ինքնաթիռի վրա:

ԱՄՆ ռազմաօդային ուժերը գերգաղտնի հետախուզական արբանյակ են դուրս բերել ուղեծիր: Որոշ աղբյուրներ նշում են, որ դա անտեսանելիության տեխնոլոգիայով պատրաստված արբանյակ է, որը գրեթե անհնար կլինի հայտնաբերել, իսկ մեկ այլ ուղեծրով կթռչի արբանյակի նմանակը` շեղելով ուշադրությունը իրական օբյեկտից: Նշվում է նաև, որ այն նախատեսված է բալիստիկ հրթիռների փորձարկումների ժամանակ ռադիոտվյալների կալանման համար:

Ռուսաստանի ռազմարդյունաբերական համալիրի ձեռնարկությունները ավելի մեծ ազատություն կստանան արտասահմանյան պատվիրատուների հետ գործարքներ կնքելիս: Այդ մասին հայտարարել է ՌԴ նախագահ Վլադիմիր Պուտինը` նշելով, որ անհրաժեշտ է ավելի ակտիվորեն գումարներ վաստակել նախկինում արտասահման մատակարարված տեխնիկայի նորոգման և սպասարկման միջոցով, որին խանգարում է համաձայնեցումների չափազանց բարձր մակարդակը: Պատվիրատուների պաշտոնական դիմումների ուսումնասիրությունը, պայմանագրերի նախապատրաստումը, թղթաբանական քաշքշուկը շատ երկար են տևում:

ՌԴ պետդուման հավանություն է տվել հեռանկարային հետազոտությունների ֆոնդ ստեղծելու մասին օրինագծին: Նոր ֆոնդը կգործի ինչպես ամերիկյան հետազոտական նախագծումների գործակալությունը (DARPA) և կզբաղվի բարձր ռիսկայնության նորարարական մշակումներով: Ներկայացնելով նոր ֆոնդի ստեղծման անհրաժեշտությունը՝ ՌԴ փոխվարչապետ Դմիտրի Ռոգոզինը նշել է, որ վերջին քսան տարվա ընթացքում ռազմարդյունաբերական բնագավառում տիրող ոչ բարվոք իրավիճակի պատճառով իրենց շատ դժվար կլինի հասնել արևմտյան գործընկերներին, որոնք առաջավոր տեխնոլոգիաների հարցում չափազանց առաջ են գնացել:

Ռուսաստանի օդադեսանտային զորքերի ռադիոէլեկտրոնային պայքարի ստորաբաժանումները սպառազինության են վերցրել «Инфауна» և МКТК-1А Дзюдоист նոր բազմաֆունկցիոնալ համալիրներ: « Инфауна » ՌԷՊ համալիրը նախատեսված է անձնակազմը և ռազմական տեխնիկան ռադիոկառավարվող պայթուցիկ նյութերից, մերձամարտում հրաձգային զինատեսակներից պաշտպանելու, ինչպես նաև հակառակորդի կապի միջոցները ռադիոճնշելու համար: Նոր համալիրների առաջին չորս միավորները դեսանտայինները փորձարկել են այս տարվա սկզբին: Ներկայումս անձնակազմերը մարտական ներդաշնակում են անցնում ուսումնական կենտրոնում: