ՌԴ արևմտյան զինվորական օկրուգի ռազմաօդային ուժերը շուտով կհամալրվեն 14 ճակատային «Су-34» ժամանակակից ռմբակոծիչներով, որոնք աստիճանաբար կփոխարինեն արդեն հնացած համարվող «Су-24» ռմբակոծիչներին:

Հյուսիսատլանտյան դաշինքի ղեկավարությունը Ղազախստանի, Ուզբեկստանի ու Ղրղզստանի հետ համաձայնագրեր է կնքել Աֆղանստանից միջազգային խաղաղապահ զորախմբի ռազմական տեխնիկան դուրս բերելիս այդ պետությունների տարածքներն օգտագործելու վերաբերյալ:

Բաթումում կայացած մամլո ասուլիսի ընթացքում ԱՄՆ պետդեպարտամենտի քարտուղար Հիլարի Քլինթոնը վստահեցրել է, որ Միացյալ Նահանգները շարունակելու են ռազմական ոլորտում համագործակցությունը Վրաստանի հետ, ուսուցանել վրացական բանակին՝ իրականացնելու երկրի օդային ու ծովային տարածքի դիտարկում, ինչպես նաև աջակցելու են Վրաստանի ռազմական ուղղաթիռների արդիականացման խնդրում: Քլինթոնը հայտարարել է, որ Վրաստանը Վաշինգտոնի օգնությամբ մոտ առաջիկայում «կբարձրացնի իր մարտունակությունը և կդառնա միջազգային ուժեղ գործընկեր»:

Թերևս վերջին օրերի ուշագրավ իրադարձություններից մեկն այն է, որ ամերիկյան Ռոդ Այլենդ նահանգի Ներկայացուցիչների պալատը մայիսի 17-ին բանաձև է ընդունել, որով ԱՄՆ նախագահին և Կոնգրեսին կոչ է արվում ճանաչել Լեռնային Ղարաբաղի Հանրապետության անկախությունը: Այդ բանաձևում նաև խրախուսվում են «որպես ազատ եւ անկախ հանրապետություն զարգանալու` ԼՂՀ ջանքերը» և դրական գնահատական է տրվում «երկրի կառուցողական ներգրավվածությանը միջազգային կառույցներում եւ տարածաշրջանային առկա խնդիրների արագ կարգավորմանը հասնելու նրա ջանքերին»:

WikiLeaks-յան գաղտնազերծված փաստաթղթերից մեկը վկայում է, որ Ադրբեջանի նախագահ Իլհամ Ալիևն ամերիկացի դիվանագետների հետ զրույցում հայտարարել է, թե Ադրբեջանի և Իսրայելի հարաբերությունները նման են սառցաբեկորի, որի միայն 10 տոկոսն է տեսանելի, իսկ մնացած 90-ը թաքնված է կողմնակի հայացքից: Ստորև ներկայացվող հոդվածը այդ 90 տոկոսը հայտնաբերելու փորձ է:

Հյուսիսատլանտյան դաշինքի գլխավոր քարտուղար Անդերս Ֆոգ Ռասմուսենը հայտարարել է, որ Աֆղանստանի կառավարությունն ու կազմակերպության ղեկավարությունը սկսել են իրականացվելիք նոր խաղաղապահ առաքելության ծրագրի մշակումը, որը կգործի 2014 թվականի ավարտին, երբ երկրի տարածքից միջազգային խաղաղապահ զորքերի դուրսբերումից հետո Աֆղանստանում կայունությունը կապահովեն երկրի անվտանգության ուժերը` շուրջ 300.000 զինվոր ու ոստիկան: Նոր ծրագիրը չի նախատեսում մարտական գործողությունների վարում, այլ նախատեսված է Աֆղանստանի անվտանգության ուժերի ուսուցման և անհրաժեշտ օգնության ցուցաբերման համար:

Լիտվայի, Լատվիայի ու Էստոնիայի խորհրդարանների միջազգային հարաբերությունների կոմիտեների անդամներն «անընդունելի» և «բացահայտ սպառնալիք պարունակող» են համարել ՌԴ Կալինինգրադի մարզի ռազմականացումը և նշել, որ այն էապես կբարդացնի Ռուսաստանի հարաբերությունները Բալթյան երկրների, Եվրոպական Միության և Հյուսիսատլանտյան դաշինքի հետ: Նրանց մտահոգությունն են հարուցում նաև վերջին շրջանում Ռուսաստանի ռազմական հզորության մեծացման մասին ՌԴ քաղաքական ու ռազմական ղեկավարության հաճախացած հայտարարությունները և խորհրդարանականները կոչ են արել այդ հանգամանքը ևս հաշվի առնել Ռուսաստան-ՆԱՏՕ հարաբերությունների պլանավորման ժամանակ: