Ռուս հայտնի գրող և հրապարակախոս, «Ճգնաժամ. ինչպես է այն ստեղծվում» և «Ով է ֆինանսավորում Ռուսաստանի փլուզումը» բեստսելլերների հեղինակ Նիկոլայ Ստարիկովի պնդմամբ, միջինասիական ժողովուրդներին խաղաղություն կբերի միայն Ռուսաստանի հետ ռազմական ու տնտեսական դաշինքի ստեղծումը:

ԱՄՆ զինված ուժերի շտաբների պետերի կոմիտեի նախագահ, գեներալ Մարտին Դեմպսին հայտարարել է, որ Պենտագոնը պատրաստ է սկսել Սիրիայի դեմ ռազմական օպերացիայի մշակումը: Միաժամանակ նա ընդգծել է, որ մինչ այդ Միացյալ Նահանգներն ու միջազգային հանրակցությունը պետք է դիմեն դիվանագիտական ու տնտեսական միջոցների:

“Национальная оборона” հանդեսի գլխավոր խմբագիր Իգոր Կորոտչենկոյի պնդմամբ, առաջիկա վեց տարիների ընթացքում Ռուսաաստանը կարող է սպառազինության արտահանման ծավալները մեծացնել 25 տոկոսով` այժմյան տարեկան 13 միլիարդից հասցնելով 16-18 միալարդ ԱՄՆ դոլար գումարի:
ՌԴ ռազմատեխնիկական համագործակցության դաշնային ծառայության տվյալներով, 2012 թվականին նախատեսվում է արտահանել 13,5 միլիարդ ԱՄՆ դոլարի սպառազինություն, 2011 թվականի 13,2 միլիարդի դիմաց:

Պաշտպանության և անվտանգության հարցերի ամերիկաիրաքյան կոմիտեի առաջին նիստում որոշում է ընդունվել Իրաքին տրամադրելու ևս 18 բազմանպատակային F-16 կործանիչ, ինչպես նաև՝ այլ ռազմական տեխնիկա: Համաձայն կոմիտեի տարածած հայտարարության, «սպառազինությունների լրացուցիչ խմբաքանակի մատակարարումը կօգնի պաշտպանել Իրաքի ինքնիշխանությունը, կապահովի նրա ռազմական պահանջները և կխորհրդանշի անվտանգության բնագավառում երկու պետությունների երկարաժամկետ համագործակցությունը»:

Ռուսաստանի պաշտպանության նախարարությունը հիասթափված է Գաբալայի ռադիոլոկացիոն կայանի վարձակալման ժամկետի երկարացման հարցում Ադրբեջանի ղեկավարության որդեգրած ոչ կառուցողական մոտեցումից:
Դեռ մարտի սկզբին լրատվամիջոցները հայտնեցին, որ, որպես վարձակալության գին, նախկին 7-ի փոխարեն Ադրբեջանը առանց որևէ բացատրության, տարեկան պահանջում է 300 միլիոն ԱՄՆ դոլար, ինչով կարելի է Ռուսաստանում երկու նույնանման կայան կառուցել, առավել ևս որ Գաբալայի ՌԼԿ-ն հիմնովին արդիականացման կարիք ունի, ինչը ևս մեծագումար ծախսեր է պահանջում:

ՆԱՏՕ-ի պատմության մեջ ամենաներկայացուցչական` 50 պետությունների ղեկավարների, պաշտպանության ու արտաքին գործերի նախարարների մասնակցությամբ գումարված Չիկագոյի գագաթնաժողովի անպտուղ լինելու հարցում համամիտ են ռուսաստանյան բոլոր փորձագետները: Ըստ այդմ, և՜ հակահրթիռային պաշտպանության եվրոպական համակարգի, և՜ աֆղանական խնդրի կարգավորման ասպարեզներում Հյուսիսատլանտյան դաշինքին Ռուսաստանի հղած հարցերը դեռեւս մնում են օրակարգում: Ավելին, ՌԴ պաշտպանության նախարարի տեղակալ Անատոլի Անտոնովը գագաթնաժողովի ավարտին հայտարարեց, որ Ռուսաստանը կարող է վերախմբագրել ՆԱՏՕ-ի հետ բանակցային գործընթացի նկատմամբ իր մոտեցումները, և Մոսկվան այժմ մանրամասն վերլուծում է Չիկագոյի գագաթնաժողովի արդյունքները, որպեսզի պարզի, թե Դաշինքի ղեկավարությունն ինչ խորությամբ է ըմբռնում իր որդեգրած ուղեգծի հետևանքները ռազմավարական կայունության պահպանման հեռանկարում:

Ուկրաինայի խորհրդարանը հավանություն է տվել երկրի նախագահի որոշմանը, որով այլ պետությունների, այդ թվում նաև Ռուսաստանին ու Միացյալ Նահանգներին թոււյլատրվում է Ուկրաինայի տարածքում կազմակերպել միջազգային զորախաղեր:
Մինչ այժմ, Ուկրաինայի օրենսդրությամբ արգելվում էր երկրի տարածքում օրենքով չնախատեսված զինված կազմավորումների գործունեությունը: