Ռուսաստանում մշակվում է հատուկ պլան առաջիկա 30 տարիներին ռազմածովային ուժերի հզորությունը ավելացնելու նպատակով: Այդ մասին հայտարարել է ՌԴ փոխվարչապետ Դմիտրի Ռոգոզինը:
Ծրագրի գլխավոր նպատակը երկարաժամկետ հեռանկարների պլանավորման միջոցով ռազմական նավատորմի պահպանումն ու ներդաշնակ զարգացումն ապահովելն է:
2012-2014թթ. ՌԴ պետական ռազմական պատվերի շրջանակներում նավատորմի մասնաբաժինը կազմում է շուրջ 10 տոկոս: Միայն այս տարի նոր ռազմանավեր և սուզանավեր գնելու, եղածները արդիականացնելու և ենթակառուցվածքներ ստեղծելու համար ոլորտին կհատկացվի 900 միլիարդ ռուբլի:

Դաշինքի անդամ 28 պետությունների պաշտպանության նախարարները Բրյուսելում համաձայնության են եկել (Alliance ground surveillance, AGS) համակարգի ֆինանսավորման հարցերի շուրջ: Համակարգի նպատակն է հայտնաբերել մոլորակի վրա ռազմական ակտիվության դրսևորումները և ապահովել տեղափոխման ու մարտական գործողությունների վարման ընթացքում Դաշինքի զորքերի անվտանգությունը:

Անվտանգության հարցերով մյունխենյան կոնֆերանսում ՌԴ արտգործնախարարը հայտարարել է, որ թեև հակահրթիռային պաշտպանության եվրոպական համակարգի ծավալման առնչությամբ խորհրդատվական հանդիպումները շարունակվում են, սակայն ինքը «Լույս չի տեսնում թունելի վերջում» և շեշտել, որ վերջին ժամանակներս ընթանում են խորհրդատվական հանդիպումներ, այլ ոչ թե բանակցություններ:

Ռազմավարական հարձակողական սպառազինությունների կրճատման` 2010 թվականի ապրիլի 8-ին տասը տարի ժամկետով կնքված և մեկ տարի առաջ` փետրվարի 5-ին ուժի մեջ մտած համաձայնագրի շրջանակներում ԱՄՆ-ն ու Ռուսաստանը 1.800 անգամ միմյանց տեղեկություններ են տրամադրել միջուկային սպառազինության կամ այն կրելու ունակ մարտական տեխնիկայի տեղափոխման մասին, ինչպես նաև հայտնել հորային բազավորման միջմայրցամաքային բալիստիկ հրթիռների տեղակայման վայրերի կոորդինատները:

ԿԺԴՀ զինվորականները նպատակահարմար են գտել ԱԹՍ ստեղծել Միացյալ Նահանգներում` Հարավային Կորեայում կառավարվող հրթիռների փորձարկումների ժամանակ օգտագործվող ամերիկյան «MQM-107D Streaker» գրոհային անօդաչու թռչող սարքի նմանությամբ:

ԱՄՆ պաշտպանության նախարար Լեոն Պանետտան հայտարարել է, որ Միացյալ Նահանգներն ու Հյուսիսատլանտյան դաշինքը ձգտում են Աֆղանստանում ՆԱՏՕ-ի առաքելության ռազմական մասն ավարտել 2013 թվականի կեսերին կամ վերջին և մարտական գործառույթների կատարումից անցնել Աֆղանստանի զինված ուժերի և անվտանգության ծառայությունների ուսուցմանն ու հրահանգավորմանը:

«Рособоронэкспорт» ընկերությունը ծրագրում է Լիբիային զենքի մատակարարման արգելքի վերացումից անմիջապես հետո այս հարցի շուրջ բանակցություններ սկսել երկրի նոր իշխանությունների հետ, ինչի ավարտից հետո միայն հնարավոր կլինի խոսել երկու պետությունների հետագա ռազմատեխնիկական համագործակցության ծավալների մասին:
Միայն 2011 թվականին լիբիական հեղափոխության արդյունքում լուծարվեցին «Рособоронэкспорт»-ի կողմից Տրիպոլիին 4 միլիոն ԱՄՆ դոլար ընդհանուր արժեքով սպառազինության մատակարարման պայմանագրեր: