Ականատեսների պնդումների համաձայն` առնվազն երեք հրթիռ է պայթել 1980 թվականին Աշրաֆում ՄԱԿ-ի աջակցությամբ հիմնադրված իրանցի փախստականների ճամբարում, ուր այժմ բնակվում է շուրջ 4.000 մարդ: Տուժածների մասին տեղեկություններ չկան, քանի որ Իրաքի զինվորականներին և իշխանության ներկայացուցիչներին արգելված է մտնել ճամբարի տարածք:

Աֆրիկայի արևմուտքում գտնվող փոքրիկ այս պետության զինված ուժերի հրամանատար, գեներալ Անտոնիո Ինջայան հայտնել է, որ մի խումբ զինվորականներ, այդ թվում նաև ծովային հետևակայիններ, գրոհելով զինված ուժերի գլխավոր շտաբը և մայրաքաղաքում տեղակայված զինվորական մի քանի այլ օբյեկտներ, փորձել են փոխել բանակի հրամանատարությանն ու երկրի կառավարությանը, սակայն ետ են մղվել և այժմ իրավիճակը վերահսկվում է:

Արաբական պետությունների լիգայի շտաբ-բնակարանը հայտարարել է, որ նախօրեին լրատվամիջոցներին հարցազրույց տված անձնավորությունը, ով ներկայացել էր որպես Սիրիայում Լիգայի դիտորդական խմբի անդամ Մուխտաշար Մախջուբ, և մատնացույց անելով բնակչության դեմ տանկեր կիրառելու կադրեր պատկերող հերթական տեսաձայնագրությունը, հայտարարել, որ Սիրիայում «ամենաիսկական ցեղասպանություն է իրականացվում», որևէ առնչություն չունի Լիգայի դիտորդական առաքելության հետ և այնտեղ նման անունով մարդ ընդհանրապես չկա:

ԱՄՆ պաշտպանության նախարարությունն ընդլայնելով Աֆղանստանում անօդաչու թռչող սարքերի կիրառման ոլորտը, բացի հետախուզությունից, պարեկումից ու ճշգրիտ հարվածներ հասցնելուց, սկսել է անօդաչու ուղղաթիռներով իրականացնել գրոհայինների վերահսկողության գոտում գտնվող իր ստորաբաժանումների մատակարարումը: «Lockheed Martini» և «Kaman Aerospace» ընկերությունների համատեղ արտադրության «K-Max» անօդաչու ուղղաթիռը, որը կարող է օդ բարձրացնել մինչև 3,5 տոննա բեռ, հիմնականում կաշխատի գիշերային ժամերին ու մեծ բարձրություններում, հնարավորինս անհասանելի լինելու համար փոքր հեռավորություններում գործող դյուրակիր զենիթահրթիռային համալիրների համար:

Պարզվել է, որ ֆիննական նավահանգստում «Patriot» հրթիռներով և 150 տոննա պայթուցիկ նյութերով բեռնված անգլիական նավի ձերբակալման հիմնական պատճառը անգլերեն կից փաստաթղթերի ոչ ճիշտ թարգմանությունն է եղել, և «rocket» բառը հրթիռների փոխարեն թարգմանվել է պիրսոտեխնիկա: Իսկ հրթիռները նախատեսված են ոչ թե Չինաստանի, այլ Հարավային Կորեայի համար:

Իրանի ռազմածովային ուժերի հրամանատար Հաբիբոլլա Սայյարին հայտարարել է, որ «Վելայաթ-90» զորախաղերի ընթացքում կփորձարկվեն սպառազինության, այդ թվում նաև հրթիռային ու տորպեդային նորագույն զինատեսակներ:
Միաժամանակ Օրմուզյան նեղուցում մեկնարկած զորախաղերի նպատակի վերաբերյալ Իրանի զինված ուժերի հրամանատարության ու արտգործնախարարության մեկնաբանությունները հակասում են միմյանց:

Համիդ Քարզայը հայտարարել է, որ Աֆղանստանից 2014 թվականին միջազգային զորախմբի դուրսբերումից հետո չի ստորագրի Միացյալ Նահանգների հետ ռազմավարական համագործակցության համաձայնագիրը, եթե Հյուսիսատլանտյան դաշինքի զինված ուժերը չդադարեցնեն գիշերային թռիչքներն ու բնակավայրերի խուզարկությունները: