«Ռուսաստանի ուղղաթիռներ» ընկերությունը ուկրաինական «Մոտոր Սիչ» ընկերության հետ պայմանագիր է կնքել տարեկան 250-270 շարժիչ մատակարարելու վերաբերյալ:
«Մոտոր Սիչ»-ի նախագահ Վյաչեսլավ Բոգուսլաևը հայտնել է, որ իրենք վաճառելու են և’ քաղաքացիական, և’ ռազմական նշանակության ուղղաթիռների համար նախատեսված շարժիչներ: 5 տարի ժամկետով կնքված պայմանագրի արժեքը կազմել է 1,2 միլիարդ դոլար:

Մեծ Բրիտանիան համաձայնվել է ԱՄՆ-ին վաճառել սպառազինությունից դուրս գրված BAE Harrier II GR9/A բոլոր 74 տախտակամածային ինքնաթիռ: Այժմ ստորագրման է պատրաստվում համապատասխան պայմանագիրը, որով ամերիկացիները կստանան նաև ինքնաթիռների շարժիչները, պահեստամասեր և հարակից սարքավորումներ:
Harrier-ները բրիտանական սպառազինությունից դուրս են գրվել այս տարվա մարտին: Հեռանկարում նրանց տեղը կզբաղեցնեն ամերիկյան F-35C Lightning II տախտակամածային կործանիչները:

ԱՄՆ ռազմածովային ուժերը «Փոլ Ֆոսթեր» ականակիր նավը նախապատրաստում են դիզելային և բիովառելիքի խառնուրդով նավարկելուն: Ռազմանավը իր մշտական տեղակայման վայրից պետք է փորձնական նավարկություն կատարի Կալիֆոռնիայում գտնվող ռազմական բազաներից մեկը` անցնելով շուրջ 343 կմ: Նավարկելիս ջրիմուռների մշակումից ստացված բիովառելիք կօգտագործվի նավի գազատուրբինային 4 շարժիչներից միայն մեկում:

Թեհրանը հայտարարել է, որ չեզոքացվել ու վնասազերծվել է երկրի «ժողովրդական տնտեսության օբյեկտների» համակարգչային բազա առավել քան վտանգավոր «տրոյանական ծրագրի» թափանցումը, որը լրջագույն վնասներ կհասցներ նաև Իրանի միջուկային օբյեկտների աշխատանքին:
Դեռևս այս տարվա հունիսին Իրանի բանակի հրամանատարությունը հայտարարել էր զինված ուժերի կազմում կիբեռնետիկ հարձակումների դեմ պայքարի հատուկ վարչություն ստեղծելու մտադրության մասին:

Ռուսական բանակի սպառազինություն է ընդունվել իր հնարավորություններով ապշեցնող ռադիոլոկացիոն հայտնաբերման А-50У բազմաֆունկցիոնալ համալիրը, որը համարվում է А-50 ինքնաթիռի լրիվ արդիականացված տարբերակը: Այն համալրվել է արբանյակային կապի ու հաշվողական տեխնիկայի ամենաարդիական միջոցներով և նախատեսված է թևավոր հրթիռների, գերձայնային ինքնաթիռների ու անգամ ուղղաթիռների հայտնաբերման համար: «Թռչող ռադարի» տեխնիկամարտավարական բնութագրերը, բնականաբար, չեն հրապարակվում:

Պենտագոնը լրջորեն մտահոգված է իր սպառազինության կարևորագույն զինատեսակներից մեկի` հարվածային անօդաչու թռչող սարքերին (ԱԹՍ) սպառնացող այս փաստով: Ծրագրահենները, որ սովորաբար ձգտում են ներթափանցել փակ ցանցեր և սեփականել գաղտնի տեղեկատվություն, կարող են կիբեռնետիկ հարձակումներ կատարել նաև «խելացի» ռազմական տեխնիկայի վրա, որն անկանխատեսելի հետևանքներ կունենա ինչպես ամերիկյան ստորաբաժանումերի, այնպես էլ խաղաղ բնակչության ու շրջակա միջավայրի համար: Ի վերջո, օրինակ ամերիկյան «Reaper» ԱԹՍ-ի կրակային հզորությունը բավական է ավերելու մի ամբողջ ատոմակայան:

Ռուսաստանի զինված ուժերի Արևմտյան ռազմական օկրուգում հաջողությամբ ավարտվել են ֆիզիկական պատրաստության նոր տիպային ծրագրի փորձարկումները, որոնցում ներգրավված էր մոտոհրաձգային և տանկային բրիգադների ավելի քան 500 ժամկետային զինծառայող:
Ծրագիրը մշակվել է ՌԴ ֆիզիկական կուլտուրայի ռազմական ինստիտուտի գիտահետազոտական կենտրոնում: Նախկինում կիրառվող մեթոդներից նորը առանձնանում է նրանով, որ ֆիզիկական պատրաստությունը բաժանված է երեք փուլի` ադապտացիոն, չափավորված և ինտենսիվ: Դա ապահովում է ծանրաբեռնվածության աստիճանական ավելացում և ֆիզիկական կայուն զարգացում: