Բրիտանիայի ռազմաօդային ուժերը 2008 թ. 14 «Voyager» օդանավերի գնման պայմանագիր էր կնքել «AirTanker» կոնսորցիումի հետ: Պայմանագրի գումարը կազմում էր 10.5 մլրդ. ֆունտ ստեռլինգ: 2011թ. ապրիլի 21-ին Մեծ Բրիտանիա առաքվեց Միացյալ Թագավորության երբևիցե ունեցած օդանավերից ամենամեծ ծավալի ռազմավարական փոխադրումներ կատարող առաջին «Voyager» օդանավը: 60 մ թևերի բացվածքով և 60մ երկարություն ունեցող օդանավը կարող է օգտագործվել և որպես օդային «հեղուկանավ», և որպես փոխադրումներ կատարող օդանավ: Այն կփոխարինի Բրիտանիայի օդային նավատորմում երկարատև ծառայած «VC-10» և «Tristar» օդանավերին: Նոր ինքնաթիռը կարող է անմիջապես թռիչքի ընթացքում այլ օդանավերի վառելիքի բաքերը լցնել 5000 լիտր/րոպե արագությամբ: Մոտ ժամանակներում կփորձարկվի «Voyager»-ի` օդում լիցքավորելու ունակությունը:

Ըստ «Forecast International» ընկերության ավիատիեզերական համակարգերի վերլուծաբան Վիլյամ Օստրովի կատարած ուսումնասիրությունների` 2011-2020 թթ. ընկած ժամանակահատվածում քաղաքացիական և կոմերցիոն համաշխարհային շուկան 18 մլրդ ԱՄՆ դոլար ընդհանուր արժողությամբ 115 արբանյակների կարիք կունենա: «Forecast International»-ը ավիատեզերական, պաշտպանության ու անվտանգության, ռազմական էլեկտրոնիկայի համակարգերի շուկայի հետազոտություններ, կանխատեսումներ և վերլուծություններ կատարող առաջատար ընկերությունն է: Ընկերության գլխավոր գրասենյակը ԱՄՆ-ի Կոննեկտիկուտ նահանգի Նյութաուն քաղաքում է:
Ուսումնասիրության համաձայն` արբանյակների հիմնական գնորդները կլինեն կառավարությունները և մասնավոր կազմակերպությունները:
Ուսումնասիրության մեջ նշվում է նաև, որ քաղաքաշինությունը, բնական ռեսուրսների օգտագործումը, գյուղատնտեսությունը, քարտեզագրումը, տրանսպորտը և շատ այլ ոլորտներ գնալով ավելի ու ավելի են կախված լինելու արբանյակային համակարգից:

«Raytheon» ընկերությունը փորձարկել է «Small Tactical Munition» (STM) հրթիռների համար նախատեսված նոր մարտագլխիկները, որոնք արտադրել է «NammoTalley» ընկերությունը` հատուկ «Raytheon» STM հրթիռների համար: «Raytheon» –ի արտադրած ամենափոքր հրթիռը`STM-ը, ունի 13 ֆունտ` մոտ 7կգ քաշ և 2 մետր երկարություն և նախատեսված է անօդաչու օդանավերի համար:
– Թեթև քաշով և փոքր չափսերի STM հրթիռները հնարավորություն են տալիս անօդաչու օդանավերին ավելի երկար մնալու օդում և կրելու ավելի շատ զենք, քան նրանք կարող էին, եթե զինված լինեին 100 ֆունտ` մոտ 45կգ քաշ ունեցող հրթիռով: STM-ը հնարավորություն է տալիս զինելու փոքր անօդաչու օդանավերը, օրինակ ` «Shadow 200»-ը, որն անհնար է զինել այլ հրթիռներով ,- ասում է «Raytheon» ընկերության անօդաչու օդանավերի հարցերով փոխտնօրեն Բոբ Ֆրանսուան:

Ապրիլի 12-ին Ինդոնեզիան ընտրել է հարավկորեական Korea Aerospace Industries (KAI) ընկերությանը` որպես գերձայնային ուսումնամարզական օդանավերի մատակարարողի: Նախնական պայմանավորվածությամբ, Ինդոնեզիան ձեռք կբերի 16 T-50 Golden Eagles օդանավեր:
-Բազմաթիվ հայտարարություններ են արվել, որ գործարքի արժեքը կկազմի մոտ 400 մլն ԱՄՆ դոլար, բայց իրականում այն կորոշվի բանակցություններից հետո,- ասել է KAI-ի նախագահ Կիմ Հոնգ Կյունգը:
Սեուլը մինչ այս փորձել է գերձայնային օդանավերի արտահանման գործարք կնքել Միացյալ Արաբական Էմիրությունների հետ, բայց` անհաջող:

Ապրիլի 19-ին Պակիստանի զինված ուժերը հայտարարել են, որ «Hatf 9» կարճ հեռահարության միջուկային մարտագլխիկով բալիստիկ հրթիռների փորձարկումը հաջողությամբ է ավարտվել:
Հրթիռը արտադրվել է Պակիստանի ռազմավարական կարճ հեռահարության զենքի զարգացման ծրագրի շրջանակներում: Այն ունի 60 կմ հեռահարություն և օժտված է բարձր ճշգրտությամբ: Պակիստանի միջուկային զինանոցը համալրված է կարճ, միջին եւ մեծ հեռահարության հրթիռներով:

Վետերանների պաշտպանության դեպարտամենտը (ՎՊԴ) սմարթֆոն հեռախոսների համար ստեղծել է «PTSD Coach» ծրագրային ապահովումը, որի օգնությամբ հետվնասվածքային սթրեսով տառապող վետերանները ցանկացած պահին կկարողանան վերացնել սթրեսը:
«PTSD Coach»–ը վետերաններին աջակցելու` ԱՄՆ-ի պաշտպանության նախարարության և ՎՊԴ համատեղ մշակած ծրագրերից մեկն է:
-Այս ծրագիրը հնարավորություն կտա ցանկացած պահի, ցանկացած վայրում օգնելու վետերաններին: Մենք հույս ունենք, որ նրանց ընտանիքները և ընկերները նույնպես այս անվճար ծրագիրը կբեռնեն իրենց հեռախոսների մեջ,- ասել է ՎՊԴ-ի քարտուղար Էրիկ Կ. Շինսեկին:

-Հնարավոր է, որ նոր միջուկային փորձարկումներ սկսվեն, քանի որ Հյուսիսային Կորեան միջուկային փորձարկումների համար նախատեսված բավականին շատ ենթակառուցվածքներ ունի, և նախաձեռնել է ևս մեկի ստեղծման աշխատանքներին,- հայտնել է Հարավային Կորեայի ազգային հետախուզության ծառայության պետ Վոն Սեյ Հունը:
Առաջին երկու միջուկային փորձարկումները Հյուսիսային Կորեան կատարել է 2006 թ-ի հոկտեմբերին և 2009 թ-ի մայիսին: Յոնգբիոն քաղաքը տասնամյակներ շարունակ Հյուսիսային Կորեայի միջուկային զենքի արտադրման ծրագրի «սիրտն» է: