ՌԴ նախագահ Վլադիմիր Պուտինն այսօր Սոչիում կանցկացնի ցամաքային և օդադեսանտային զորքերի մասով սպառազինության պետական ծրագրի կատարման ընթացքին նվիրված խորհրդակցություն:
Դեռ 2010 թվականին որոշում էր ընդունվել մինչև 2020 թվականը ռուսական բանակի վերազինման համար հատկացնել 20 տրիլիոն ՌԴ ռուբլի գումար, որից 2,6 տրիլիոն ռուբլին ցամաքային ու օդադեսանտային զորքերի բաժինն է: Այդ գումարով պետք է 2020 թվականին զորատեսակներում նոր մարտական տեխնիկայի տեսակարար կշիռը հասցվի 70 տոկոսի:

Մոլորակի կլիմայի գլոբալ ջեմացումն առավել է սրում պայքարը բնական ռեսուրսներով հարուստ Հյուսիսային բևեռի համար, ինչը պահանջում է նյութական լուրջ ներդրումներ:
Ըստ մամուլում շրջանառվող լուրերի, ՌԴ պաշտպանության նախարարությունում շտապ կարգով մշակվում են Արկտիկայում պարեկելու համար նախատեսված նոր ինքնաթիռին ներկայացվող պահանջները. պատճառն առաջիկա տարիներին շահագործումից մի քանի տասնյակ «Ил-38» և «Ил-38Н» ինքնաթիռների դուրսգրումն է:

Ռուսաստանյան «РТ-Химические технологии и композиционные материалы» հոլդինգը հրթիռահրետանային զինամթերքի համար ստեղծել է հրակայուն կոնտեյներներ: Արտաքին միջավայրում Ցելսիուսի 1.500 աստիճան ջերմության դեպքում նրանց ներսում ջերմաստիճանն առաջին 15 րոպեների ընթացքում չի գերազանցում 170 աստիճանը, իսկ հրթիռներն ու արկերը չեն պայթում երկհարկանի տան բարձրությունից ցած ընկնելիս: Այս բնութագրերը նկատելիորեն գերազանցում են ՌԴ պաշտպանության նախարարության ներկայացրած պահանջները:

«Рособоронэкспорт»-ի գլխավոր տնօրեն Իգոր Սեվաստյանովը հայտնել է, որ բազմաթիվ պետություններ բարձր են գնահատում խորհրդային արտադրության արդիականացված տանկերը, ինչը կարող է դառնալ արդյունավետ համագործակցության նոր ուղղություն: Կազմակերպությունն այժմ ունի «Տ-72» արդիականացման շուրջ 200 պատվեր, սակայն չի նշել պատվիրատու պետությունների անունները:

«Ռոստեխնոլոգիաներ» պետական կորպորացիան հայտարարել է, որ ֆրանսիական «Turbomeca» ընկերությունը հոկտեմբերին կսկսի ռուսաստանյան բազմանպատակային «Ка-226Т» և «Ка-62» ուղղաթիռների շարժիչների մատակարարումը: Բացի այդ, «Вертолеты России» ընկերությունն իրավունք է ստացել ինքնուրույն իրականացնել այս շարժիչների նորոգումն ու տեխնիկական սպասարկումը: Սա Ռուսաստանում ուղղաթիռային շարժիչների ասպարեզում ֆրանսիական տեխնոլոգիաների առաջին կիրառումն է:
Այդ մասին համաձայնագիրը ստորագրվել է Մերձմոսկովյան Ժուկովսկիում երեկ բացված «Տեխնոլոգիաներ և մեքենաշինություն-2012» միջազգային տոնավաճառում:

Հնդկաստանում սկսվել են «Արջուն» տանկի նոր մոդիֆիկացիայի փորձարկումները: «Արջուն ՄԿ-2»-ը նախատեսված է օտարերկրյա արտադրության հին տանկերին փոխարինելու համար: Փորձարկումների հաջող ավարտի դեպքում դեպքում անմիջապես կսկվի 124 տանկերից բաղկացած առաջին խմբաքանակի արտադրությունը:

ՌԴ ցամաքային զորքերի գլխավոր հրամանատար, գեներալ-գնդապետ Վլադիմիր Չիրկինը, Սուդանում որպես ռուսաստանյան խաղաղապահ առաքելության դադարեցման և 122 զինծառայողի ու չորս «Ми-8МТВ» ուղղաթիռների վերադարձման հիմնական պատճառ է նշել խիստ շոգ եղանակը, որին հարմարեցված չի եղել ռուսաստանյան մարտական տեխնիկան, ինչի պատճառով մարտական ուղղաթիռների շարժիչները գերտաքացել են, իսկ անձնակազմը ծառայել է առավել քան անհարմար պայմաններում: