Իսրայելի պաշտպանության բանակի (Ցախալ) մի շարք գեներալներ առաջարկել են իսրայելական բանտերից ավելի մեծ թվով պաղեստինցիների ազատել «Համաս» ծայրահեղական շարժման դեմ պայքարում Պաղեստինի ղեկավար Մահմուդ Աբասին աջակցելու նպատակով:
Ինչպես գրում է իսրայելական «Հաարեց»-ը, գեներալները առաջարկել են Հիլադ Շալիթի հետ փոխանակելու նպատակով ազատ արձակվող 1027 պաղեստինցի բանտարկյալներից բացի բաց թողնել նաև Աբասի ղեկավարած ՖԱԹՀ կուսակցության անդամներին:

Սկսվել են 955 «Բորեյ» նախագծի սերիական արտադրության առաջին ատոմային սուզանավի` «Ալեքսանդր Նևսկիի» գործարանային ընթացային փորձարկումները: Առաջին կարգի կապիտան Վասիլի Տանկովիդի ղեկավարությամբ սուզանավը դուրս է եկել Սպիտակ ծով: ՌԴ Խաղաղօվկիանոսյան նավատորմում նախապես ձևավորվել է անձնակազմ, որը լրացուցիչ պատրաստություն է անցել Օբնինսկի ուսումնական կենտրոնում:

Քիմիական զենքի արգելման կազմակերպության ներկայացուցիչ Ալեքսանդր Ստուդենեկինը հայտնել է, որ ոլորտում ստանձնած միջազգային պարտավորությունները կատարելու համար Ռուսաստանին մնացել է ոչնչացնել երկրի զինանոցում պահվող քիմիական զենքի պաշարների շուրջ 40 տոկոսը:
Սկզբնապես նախատեսվում էր ողջ աշխարհում քիմիական զենքի պաշարները ոչնչացնել մինչև 2012թ.: Սակայն գործընթացի դժվարության հետ կապված նոր վերջնաժամկետ է սահմանվել 2015թ. դեկտեմբերի 31-ը:

ԱՄՆ-ը և Իրաքը չեն կարողացել համաձայնության գալ, որը թույլ կտար ամերիկյան հիմնական զորախումբը դուրս բերելուց հետո Իրաքում թողնել մի քանի հազար ամերիկյան զինծառայողներ հատուկ օպերացիաների և վարժանքների մասնակցելու համար: ԱՄՆ նախագահ Բարաք Օբաման բանակցել է Իրաքի վարչապետ Նուրի ալ Մալիքիի հետ, սակայն որևէ պայմանավորվածություն ձեռք չի բերվել:
Հայտնի է, որ ամերիկյան զորքերը Իրաքից դուրս կբերվեն մինչև այս տարվա վերջ, իսկ 2012թ. այնտեղ կմնան ամերիկյան 150 զինծառայողներ:

ՌԴ վարչապետ Վլադիմիր Պուտինի մամուլի քարտուղար Դմիտրի Պեսկովը, մեկնաբանելով ամերիկացի հանրապետական սենատոր Ջոն Մաքքեյնի հայտարարությունները նշել է, որ վերջինիս արտահայտություններում բանականությունը գնալով նվազում է:
Մաքքեյնը ասել էր, որ Մուամար Քադաֆիի մահը առիթ է, որ բռնապետերը սկսեն նյարդայնանալ: Նա բռնապետերի շարքին է դասել նաև Ռուսաստանի վարչապետին և Սիրիայի նախագահ Բաշար Ասադին, ինչպես նաև Չինաստանի ղեկավարության որոշ ներկայացուցիչների` չնշելով նրանց անունները:

Վերջին 10 տարիներին ԱՄՆ պաշտպանության նախարարությունը 1,1 տրիլիոն դոլար է վճարել ընկերությունների, որոնք այս կամ այն կերպ ներգրավված են եղել խաբեբայություններում: Այդ մասին են վկայում սենատոր Բերնի Սանդերսի պահանջով պատրաստված հետազոտության արդյունքները:
Նշված միջոցներն ստացել են ամերիկյան ռազմարդյունաբերական ոլորտի 37 ընկերություններ, որոնց հետ ուղղակի պայմանագրեր են կնքվել, այդ թվում Boeing-ը, Lockheed Martin-ը և Northrop Grumman-ը: Սակայն ռազմական պատվերների անմիջական իրականացմանը մասնակցել են ավելի քան 300 ընկերություններ:

Լիբիական հեղափոխությունը թերևս ամենամեծ նվերը եղավ «Ալ Քաիդային», որը, արևմտյան մամուլի պնդմամբ, դեռ մարտ-ապրիլ ամիսներին, թալանելով անտերության մատնված զինապահեստները, սկսեց տիրանալ խորհրդային արտադրության մեծաքանակ դյուրակիր զենիթահրթիռային համալիրների, այդ թվում նաև «Игла-С» կայանքներին (կամ դրանց չինական նմանօրինակներին), որոնց առկայությունը Քադաֆիին հավատարիմ ուժերի մոտ ապշեցրել էր ամերիկացիներին: