Այսօր առավոտյան քուրդ գրոհայինները Թուրքիայի հարավ-արևելքում հարձակվել են զինվորական մի քանի պահակակետերի վրա, ինչի արդյունքում, ըստ Reuters գործակալության, զոհվել են թուրք 21 զինծառայողներ: Թուրքական Hurriyet-ը գրում է 24 զոհի և բազմաթիվ վիրավորների մասին: Միաժամանակ հարձակման է ենթարկվել 8 պահակակետ, որոշ տեղերում բախումները շարունակվել են մի քանի ժամ:

Հնդկաստանի պաշտպանության նախարարությունը հնդկական BEML ընկերության հետ պայմանագիր է կնքել 204 հատ նորոգման-տարհանման զրահապատ մեքենա գնելու վերաբերյալ: Դրանք նախատեսված են խիստ վնասված Т-72 տանկերի տարհանման կամ դաշտային պայմաններում նորոգման համար: Հնդկական բանակի տանկային տեխնիկայի կեսից ավելին կազմում են Т-72-ները:

Հնդկաստանի պաշտպանական հետազոտությունների և մշակումների գործակալությունը բուսական դեղամիջոց է ստեղծել բարձր լեռնային պայմաններում զինվորների մտավոր և ֆիզիկական ունակությունները բարձրացնելու նպատակով: Դեղամիջոցի բաղադրության մեջ մտնում են հակաօքսիդանտներ և կենսաբանական ակտիվ նյութեր, որոնք լավացնում են արյան շրջանառությունը, սրտի, ներքին օրգանների աշխատանքը և այլն:

Ռուսաստանի ռազմավարական նշանակության ռմբակոծիչները սառը պատերազմի ավարտից ի վեր օրերս վերստին թռիչքներ են կատարել Բալթիկ ծովի վրայով, ի պատասխան որի, երեկ օդ են բարձրացել նաև Հյուսիսատլանտյան դաշինքի կործանիչները:
Մերձբալթյան պետություններն իրենց մտահոգությունը հայտնելով կատարվածի համար, հայտարարել են, որ Մոսկվան պարտավոր է բացատրել իր քայլի պատճառները:

Ըստ ռուսական մամուլի հրապարակումների` Հյուսիսատլանտյան դաշինքում ՌԴ մշտական ներկայացուցիչ Դմիտրի Ռոգոզինը երկրի նախագահ Դմիտրի Մեդվեդևին է ներկայացրել ԱՄՆ, ՆԱՏՕ-ի և ՌԴ հակահրթիռային պաշտպանության համակարգերի միավորման միջոցով Երկիր մոլորակը խոշոր երկնաքարերի ու աստերոիդների հետ բախումից պաշտպանելու ծրագիր:
Ռոգոզինի մտահղացման համաձայն` միացյալ համակարգը պետք է վերահսկվի ՄԱԿ-ի Անվտանգության խորհրդի կողմից, որի անդամ Ռուսաստանն էլ կունենա վետոյի իրավունք:

Աֆղանստանի պաշտպանության նախարարը հայտարարել է, որ 2014թ. երկրից Հյուսիսատլանտյան դաշինքի զորքերի դուրսբերումից հետո տարեկան այդքան գումար կպահանջվի Աֆղանստանի պաշտպանունակության ապահովման համար: Ի դեպ, այդ գումարը եռապատիկ գերազանցում է երկրի տարեկան բյուջեն:
Արևմտյան փորձագետների կարծիքով արտաքին ֆինանսական օգնության կարիք Աֆղանստանը կունենա նվազագույնը մինչև 2025 թ.:

Սոմալիի զինված ուժերի բազաներից մեկի մոտ ամերիկյան անօդաչու թռչող սարքի վթարը 7 զինծառայողի մահվան, ևս 13-ի վիրավորվելու պատճառ է դարձել:
ԱՄՆ հատուկ ծառայությունները հետևողականորեն ընդլայնում են անօդաչու թռչող սարքերի կիրառությունը Սոմալիում, Եմենում, Աֆղանստանում ու Պակիստանում իսլամ գրոհայինների դեմ իրականացվող մարտական գործողությունների ընթացքում: