Մամուլի հաղորդումների համաձայն` Ադրբեջանի ներքին գործերի և ՌԴ իրավապահ մարմինների «Սահման-Վահան» անվանմամբ համատեղ զորավարժություններն ընթանում են պետական սահմանին հարակից ադրբեջանական 6 շրջաններում:
Զաքաթալայի շրջանում, տեղի բնակիչների հաղորդմամբ, անգամ պահակակետեր են տեղակայվել, ուր ներքին գործերի և ոստիկանության զինված աշխատակիցները մանրամասն ստուգում են ավտոմեքենայով շրջան մտնող և դուրս եկող բոլոր անձանց:
Շրջանի ոստիկանությունում հաստատել են այդ փաստը, սակայն գործողության գաղտնիությունը վկայակոչելով, այլ տեղեկություններ չեն հաղորդել:

Հնդկաստանի պաշտպանության նախարարությունը հայտարարել է, որ մտադիր է զբաղվել տորպեդային սպառազինության մշակման ու փորձարկման` դեռևս ԽՍՀՄ օրոք Իսիկ Կուլ լճի ափին կառուցված «Դաստան» կենտրոնի արդիականացմամբ: Խորհրդային տարիներին այստեղ իրականացվում էին ժամանակի համար եզակի ու գերարագ, ինչպես նաև միջուկային մարտագլխիկներ կրելու ունակ «Շկվալ» թևավոր ռեակտիվ տորպեդների ստորջրյա փորձարկումները:
ԽՍՀՄ փլուզումից հետո կենտրոնը մատնվել էր փաստական անգործության: Բայց թեև Կիրգիզիայում որևէ գաղտնիք գնելն առանձնապես դժվար չէր, օտարերկրյա հատուկ ծառայություններին տարիներ շարունակ չէր հաջողվում անհրաժեշտ տեղեկություններ ձեռք բերել այս հրթիռների մասին:

Թեև ՌԴ նախագահի օգոստոսի 10-ի հրամանագրով սահմանված մեկամսյա ժամկետը լրացել է, սակայն Ռուսաստանի 19 ուժային գերատեսչությունների և ծառայությունների պաշտոնական ինտերնետ կայքերն այնպես էլ ձեռք չեն բերել ներկային ու նրա թելադրած իրական խնդիրներին առնչվող բովանդակություն և հետևողականորեն շարունակում են այցելուներին առաջարկել հիմնականում պատմական բովանդակության տեղեկանքներ:
Խոսքը վերաբերում է հատկապես Պահպանության դաշնային ծառայությանը, Արտաքին հետախուզական, ինչպես նաև Սուրհանդակային պետական ծառայություններին: Իսկ «Рособоронзаказ»-ն ընդհանրապես մոռացել էր պաշտոնական կայքէջում զետեղել անգամ… իր լրատվական ծառայության հեռախոսահամարը:

Քադաֆիի վարչակարգի ներկայացուցիչ Մուսա Իբրահիմը հայտարարել է, որ գնդապետին հավատարիմ ուժերը Բանի Վալիդ քաղաքի ուղղությունում գերել են 17 օտարերկրյա վարձկանների, որոնց մեծամասնությունը ֆրանսիացիներ են: Կան նաև երկու բրիտանացիներ և Կատարի մեկ քաղաքացի:
Այդ մարտերի ընթացքում ազգային անցումային կառավարության ուժերը փորձել էին մտնել քաղաք, սակայն ծանր կորուստներով հետ էին շպրտվել, իսկ Քադաֆիին հավատարիմ զորքերի հակահարձակումը կանգնեցվել էր միայն ՆԱՏՕ-ի օդային նոր հարվածների միջոցով:

Այդ մասին հայտարարել է Քադաֆիի վարչակարգի ներկայացուցիչ Մուսա Իբրահիմը, նշելով, որ ճակատամարտը դեռ չի ավարտվել, իսկ իրենք ունեն պայքարը դեռ ամիսներ շարունակելու համար անհրաժեշտ զենք ու զինամթերք: Նա վերստին հավաստիացրել է, որ Քադաֆին գտնվում է Լիբիայում և լրիվությամբ ղեկավարում իրեն հավատարիմ ուժերի գործողությունները, հանդիպում մարդկանց հետ, մասնակցում բոլոր խորհրդակցություններին և տալիս համապատասխան ցուցումներ:

ՌԴ պաշտպանության նախարարությունը հայտարարել է, որ Դրագունովի դիպուկահար հրացանը ոչ միայն չի հանվում ՌԴ զինված ուժերի սպառազինությունից, այլև շարունակելու է մնալ ոչ միայն նոր ստեղծվելիք դիպուկահարների ստորաբաժանումների, այլև մյուս զորատեսակների սպառազինության կարևոր բաղկացուցիչներից մեկը:
Պաշտպանության նախարարությունը սահմանափակվելու է միայն արտասահմանյան արտադրության որոշ դիպուկահար հրացանների ձեռքբերմամբ:

Անկարան հայտարարել է, որ Միջերկրական ծովի արևելյան հատվածում վիճելի պատկանելության նավթագազային հանքավայրում Կիպրոսի կողմից հորատման աշխատանքների սկսման դեպքում այդպիսին կլինի Թուրքիայի պատասխանը: Թուրքիան ինքն է պատրաստվում երկրաբանական հետախուզություն սկսել այդ վայրում և ռազմածովային նավատորմը ետ կդարձնի հանքավայրին մոտեցող Կիպրոսի նավերին:
Չնայած դրան, նախագահ Դիմիտրիս Խրիստոֆիասը հայտարարել է, որ իր երկիրը կշարունակի իրականացնել իր ինքնիշխան իրավունքները, որոնց թվին է դասվում նաև միջազգային իրավունքի շրջանակներում բնական պաշարների շահագործումը և Կիպրոսը սկսել է հանքավայրի հետախուզական հորատումը: