ԱՄՆ նախագահ Բարաք Օբաման սերժանտ Լերոյ Արթուր Պետրիին կպարգևատրի Պատվո մեդալով: Վերջինս Աֆղանստանում մարտական գործողությունների ժամանակ փրկել է իր ծառայակից ընկերների կյանքը` կորցնելով ձեռքը: 31-ամյա Պետրին կդառնա Վիետնամի պատերազմից հետո կենդանության օրոք ԱՄՆ զինվորական բարձրագույն պարգևի արժանացած երկրորդ մարդը: Առաջինը սերժանտ Սալվատորե Ջյունտան էր 2010թ.:
2008թ. մայիսին պարեկություն կատարելիս Լերոյ Արթուր Պետրին և մեկ այլ զինծառայող թալիբների պատրաստած ծուղակն են ընկել, երկուսն էլ վիրավորվել են:

Ֆրանսիայի պաշտպանության նախարարությունը Astrium ընկերության հետ պայմանագիր է կնքել քիմիական զենքի ոչնչացման գործարանի կառուցման վերաբերյալ, որը կզբաղվի Առաջին համաշխարհային պատերազմի տարիներին արտադրված քիմիական ռազմամթերքի ոչնչացմամբ: Գործարանը կսկսի աշխատել 2015թ. և տարեկան 42 տոննա քիմիական զինամթերք կոչնչացնի:

Վենեսուելան ստացել է ռուսական Տ-72Բ1 տանկերի առաջին խմբաքանակը` 35 հատ: Ընդհանուր առմամբ, պետք է մատակարարվի 92 միավոր Տ-72: Տանկերը գնվել են 2009թ. Ռուսաստանի հատկացրած արտահանման վարկի միջոցներով:

Ռուսաստանի միացյալ ավիաշինական կորպորացիան դադարեցրել է համագործակցությունը Տաշքենդի` Չկալովի անվան ավիացիոն արտադրական միավորման հետ, որն արտադրում էր ԽՍՀՄ, ապա նաև Ռուսաստանի ռազմատրանսպորտային ավիացիայի հիմնական միջոց հանդիսացող ԻԼ-76 ինքնաթիռները: Արտադրությունն աստիճանաբար Ռուսաստան տեղափոխելու որոշում ընդունելուն զուգահեռ այնտեղ կատարվում էր միայն տեխնիկայի վերջնական հավաքում դեռ ԽՍՀՄ տարիներից մնացած կաղապարներով, պահեստամասերի հիմնական մասը տրամադրում էր Ռուսաստանը:

Եվրոպական Cassidian ընկերությունը Կանադայի ռազմական հետազոտությունների և նախագծումների կազմակերպության կողմից լազերային զենքի բոլոր տեսակներից նավերի պաշտպանության համակարգի ստեղծման պատվեր է ստացել: LOCATES նոր համակարգի հիմնական խնդիրը կլինի լազերային ուղղորդմամբ հրթիռներից և լազերային թիրախացուցիչներից նավերը պաշտպանելը: Այն նաև կկարողանա գրանցել նմանատիպ հրթիռների արձակումները և զգուշացնել անձնակազմին: Որպես հակազդման միջոց համակարգը նույնպես լազեր կկիրառի այլ միջոցների հետ […]

ՀՀ պաշտպանության նախարար Սեյրան Օհանյանը հունիսի 1-ին ընդունել է Հայ բարեգործական ընդհանուր միության նախագահ Պերճ Սեդրակյանին: Հանդիպման ընթացքում քննարկվել են բանակաշինությանը Սփյուռքի աջակցության հարցեր:
Սեյրան Օհանյանը բարձր է գնահատել հայրենիքի պաշտպանության գաղափարի շուրջ Հայրենիք-Սփյուռք համերաշխությունն ու միասնականությունը:
Կարևորելով բանակաշինությանը Սփյուռքի աջակցությունը` Պերճ Սեդրակյանը նշել է, որ այսուհետ ռազմակրթական ծրագրերին աջակցելը լինելու է Հայ բարեգործական ընդհանուր միության ուշադրության կենտրոնում:

Ռուսական սպառազինության ու ռազմական տեխնիկայի արտահանմամբ զբաղվող «Ռոսօբորոնէքսպորտ» ընկերության հատուկ հանձնարարությունների գծով տնօրեն Նիկոլայ Դիմիդյուկի կարծիքով, Հավաքական անվտանգության պայմանագրի կազմակերպության (ՀԱՊԿ) և ԱՊՀ անդամ երկրները վաղ թե ուշ ստիպված են նոր զենք գնել Ռուսաստանից, քանի որ սպառազինությունը նույնպես հնանում է և չի կարող շարունակ արդիականացվել: