ԱՄՆ ծովային հետևակի` մարտական գործողությունների վարման լաբորատորիան հեռակառավարվող բեռնատարների նախագծման աշխատանքներ է իրականացնում: Դրանք կկիրառվեն զինամթերքի, սննդի և այլ տեսակի բեռների տեղափոխման համար: Նման մեքենաներ կստեղծվեն առնվազն երկու տարբերակով, այդ թվում 7 տոննա բեռնատարողությամբ: Առաջին փորձարկումներն արդեն նշանակված են այս տարվա մայիսին:

Նախագահ Սերժ Սարգսյանը Սահմանապահի օրվա՝ ապրիլի 26-ի նախօրեին այցելել է մայրաքաղաքի Դավիթաշեն համայնքում գտնվող ՀՀ կառավարությանն առընթեր ազգային անվտանգության ծառայության սահմանապահ զորքերի նորակառույց համալիր:
Հանրապետության ղեկավարը շրջել է համալիրում, ծանոթացել նորակառույցի պայմաններին: Համալիրի շինարարական, բարեկարգման աշխատանքներն ավարտված են, և այն պատրաստ է շահագործման: Բոլոր շենքերը և շինությունները կառուցված են շինարարական ժամանակակից նորմերին համապատասխան:

Բրիտանիայի ռազմաօդային ուժերը 2008 թ. 14 «Voyager» օդանավերի գնման պայմանագիր էր կնքել «AirTanker» կոնսորցիումի հետ: Պայմանագրի գումարը կազմում էր 10.5 մլրդ. ֆունտ ստեռլինգ: 2011թ. ապրիլի 21-ին Մեծ Բրիտանիա առաքվեց Միացյալ Թագավորության երբևիցե ունեցած օդանավերից ամենամեծ ծավալի ռազմավարական փոխադրումներ կատարող առաջին «Voyager» օդանավը: 60 մ թևերի բացվածքով և 60մ երկարություն ունեցող օդանավը կարող է օգտագործվել և որպես օդային «հեղուկանավ», և որպես փոխադրումներ կատարող օդանավ: Այն կփոխարինի Բրիտանիայի օդային նավատորմում երկարատև ծառայած «VC-10» և «Tristar» օդանավերին: Նոր ինքնաթիռը կարող է անմիջապես թռիչքի ընթացքում այլ օդանավերի վառելիքի բաքերը լցնել 5000 լիտր/րոպե արագությամբ: Մոտ ժամանակներում կփորձարկվի «Voyager»-ի` օդում լիցքավորելու ունակությունը:

Ըստ «Forecast International» ընկերության ավիատիեզերական համակարգերի վերլուծաբան Վիլյամ Օստրովի կատարած ուսումնասիրությունների` 2011-2020 թթ. ընկած ժամանակահատվածում քաղաքացիական և կոմերցիոն համաշխարհային շուկան 18 մլրդ ԱՄՆ դոլար ընդհանուր արժողությամբ 115 արբանյակների կարիք կունենա: «Forecast International»-ը ավիատեզերական, պաշտպանության ու անվտանգության, ռազմական էլեկտրոնիկայի համակարգերի շուկայի հետազոտություններ, կանխատեսումներ և վերլուծություններ կատարող առաջատար ընկերությունն է: Ընկերության գլխավոր գրասենյակը ԱՄՆ-ի Կոննեկտիկուտ նահանգի Նյութաուն քաղաքում է:
Ուսումնասիրության համաձայն` արբանյակների հիմնական գնորդները կլինեն կառավարությունները և մասնավոր կազմակերպությունները:
Ուսումնասիրության մեջ նշվում է նաև, որ քաղաքաշինությունը, բնական ռեսուրսների օգտագործումը, գյուղատնտեսությունը, քարտեզագրումը, տրանսպորտը և շատ այլ ոլորտներ գնալով ավելի ու ավելի են կախված լինելու արբանյակային համակարգից:

«Raytheon» ընկերությունը փորձարկել է «Small Tactical Munition» (STM) հրթիռների համար նախատեսված նոր մարտագլխիկները, որոնք արտադրել է «NammoTalley» ընկերությունը` հատուկ «Raytheon» STM հրթիռների համար: «Raytheon» –ի արտադրած ամենափոքր հրթիռը`STM-ը, ունի 13 ֆունտ` մոտ 7կգ քաշ և 2 մետր երկարություն և նախատեսված է անօդաչու օդանավերի համար:
– Թեթև քաշով և փոքր չափսերի STM հրթիռները հնարավորություն են տալիս անօդաչու օդանավերին ավելի երկար մնալու օդում և կրելու ավելի շատ զենք, քան նրանք կարող էին, եթե զինված լինեին 100 ֆունտ` մոտ 45կգ քաշ ունեցող հրթիռով: STM-ը հնարավորություն է տալիս զինելու փոքր անօդաչու օդանավերը, օրինակ ` «Shadow 200»-ը, որն անհնար է զինել այլ հրթիռներով ,- ասում է «Raytheon» ընկերության անօդաչու օդանավերի հարցերով փոխտնօրեն Բոբ Ֆրանսուան:

Ադրբեջանական լրատվամիջոցներն այսօր հաղորդել են, որ հայկական զինված ուժերը հերթական անգամ խախտել են հրադադարի ռեժիմը: ՀՀ պաշտպանության նախարարի մամուլի քարտուղար Դավիթ Կարապետյանը, պատասխանելով ռուսական Regnum լրատվական գործակալության այն հարցին, թե իրականությանը համապատասխանո՞ւմ է արդյոք այդ հայտարարությունը, ասել է.
– Ադրբեջանի ամենօրյա հայտարարությունները, թե իբր հայկական կողմը խախտել է հրադադարի ռեժիմը, նույնիսկ առաջին հայացքից զավեշտական են: Ադրբեջանի ապատեղեկատվության գրչակները անգամ մոռանում են տեխնիկական հնարքներ գործադրել, որպեսզի քողարկեն իրենց տեղեկատվության շինծու լինելը:

ՀՀ պաշտպանության նախարարի առաջին տեղակալ Դավիթ Տոնոյանը ընդունել է Ինթերնեյշնլ Թրասթ Ֆունդ կազմակերպության միջազգային համագործակցության գծով խորհրդական Իստոկ Հոչևարին, տարածաշրջանային ներկայացուցիչ Լուկա Բահինին և Հայաստանում Միգրացիայի միջազգային կազմակերպության գրասենյակի ղեկավար Իլոնա Տեր-Մինասյանին:
Ինթերնեյշնլ Թրասթ Ֆունդ կազմակերպության ներկայացուցիչների Հայաստան այցի նպատակն է մարդասիրական ականազերծման ուղղությամբ զարգացնել համագործակցությունը ՀՀ պաշտպանության նախարարության հետ: