2014թ. հունվարի 13-ից փետրվարի 2-ը ՀՀ զինված ուժերի 75 հոգանոց խաղաղապահ ստորաբաժանումը ԳԴՀ-ում տեղակայված ԱՄՆ զինված ուժերի ուսումնավարժական կենտրոնում մասնակցել է «Կոսովոյի ուժեր» ծրագրի շրջանակներում կազմակերպված հերթական բազմազգ զորավարժությանը: Հայկական ստորաբաժանման տեղափոխումը Հայաստանից Գերմանիա եւ հակառակ ուղղությամբ իրականացվել է ԱՄՆ ռազմաօդային ուժերի ինքնաթիռներով:

Զորակոչի վերջին օրն է: Չնայած տեղացող, հորդառատ անձրեւին, ծնողները կենտրոնական հավաքակայանի առջեւ անհամբեր սպասում են, թե երբ իրենց ներս կհրավիրեն՝ հետեւելու վիճակահանությանը: Զորիկ Թամրազյանը կնոջ եւ կրտսեր որդու հետ եկել է բանակ ճանապարհելու ավագ որդուն՝ Գարեգին Թամրազյանին: Ասում է՝ որդին լավ դաստիարակություն է ստացել, կոփված է, ինքնուրույն և համոզված է, որ լավ ու պարտաճանաչ զինվոր է դառնալու: Ըստ նրա` «Մեր զավակները իրենց ոգեղենությամբ են հզոր: Նրանք պետք է իմանան, որ հայոց Արտաշես թագավորը մեր սահմաններին, ըստ պատմահայր Մովսես Խորենացու, սահմանաքարեր է տեղադրել, որոնցից շատերը հայտնաբերվել են 20-րդ դարում: Հայ զինվորները պետք է իմանան, որ իրենք հայկական լեռնաշխարհի Արտաշիսյան սահմանաքարերի մշտարթուն պահապաներն են եւ պետք է աչալուրջ ու զգոն լինեն կոյունլու ցեղերի նավթադոլարային տափարակներից եկող վտանգի նկատմամբ»: Նորակոչիկի ծնողը նշում է, որ հրամանատարությունից էլ ակնկալիքներ ունի. «Թող լինեն խիստ, պահանջկոտ եւ արդար»:

«Թեեւ կարող էի վեց ամսից զորակոչվել, բայց ընկերուհիս` Աննան, պնդեց, որ գնամ ու ծառայեմ: Միասին էլ զինկոմիսարիատ գնացինք: Դիմում գրեցի եւ, ահա, մեկնում եմ ծառայության: Աննայի համար կարեւոր է, որ իր ընտրյալը բանակում ծառայած լինի: Ասում է` չի ամուսնանա հայրենիքի հանդեպ իր պարտքը չկատարած երիտասարդի հետ: Սովորում եմ ԵՊՀ Իջեւանի մասնաճյուղի պատմության ֆակուլտետի առաջին կուրսում: Ընկերուհիս կարծում է, որ պատմություն դասավանդելու, հայրենիքի մասին խոսելու իրավունք ձեռք կբերեմ ոչ թե համալսարանն ավարտելուց, այլ գերազանց ծառայելուց հետո: Ես համամիտ եմ եւ վստահ` կարդարացնեմ Աննայի ակնկալիքները, նա ինձնով հպարտանալու առիթներ դեռ շատ կունենա: Աննան ծնվել է նոյեմբերի 25-ին, Մոնթե Մելքոնյանի ծննդյան օրը: Նրա համար Մոնթեն հայրենասիրության, նվիրումի, ազնվության, արդարամտության, արժանապատվության մարմնացում է: Աննան ասում է, որ Մոնթեն այն իդեալն է, որին պետք է ձգտել: Խոստացել եմ շարունակել Մոնթեի գործը… Կծառայեմ ու կսպասեմ Աննայի նամակներին: Որոշել եմ` հենց զորացրվեմ, Աննային ամուսնության առաջարկություն եմ անելու: Վստահ եմ՝ չի մերժի»:

1-ին բանակային զորամիավորումում նոր ուսումնական տարին մեկնարկեց մի շարք պլանային միջոցառումներով, որոնցից առանձնանում է հնգօրյա հրամանատարական հավաքը, որին մասնակցում էին ենթակա զորամասերի հրամանատարներն ու նրանց տեղակալները, եւ որի բարձր մակարդակով անցկացման համար լրացուցիչ խթան եղավ պաշտպանության նախարարի` վերջերս զորամիավորում կատարած այցը, որի ընթացքում Սեյրան Օհանյանը, ի թիվս այլ հարցերի, կարևորեց վաշտ-մարտկոց օղակների դերը, որպես ուսուցման ու դաստիարակության կենտրոնների: Հրամանատարական հավաքի տեսական պարապմունքներն ընթացան անհրաժեշտ մեթոդական բազայով համալրված, լավ կահավորված լուսավոր լսարաններում, ցուցադրականը` շարահրապարակում, մարտավարական դաշտում և այլ բացազատված տեղամասերում:

Հայաստան – ՆԱՏՕ համագործակցության և Հյուսիսատլանտյան դաշինքի DEEP («Ռազմական ուսուցման որակավորում») ծրագրի շրջանակներում հունվարի 20-ից 24-ը Վ.Սարգսյանի անվան ռազմական ինստիտուտում դասախոսություններ կարդաց կանադացի պահեստազորի գեներալ Էռնեստո Բ.Բենոն: Ինստիտուտի ուսանողները, ինչպես նաև դասախոսները հնարավորություն ստացան ծանոթանալու հրամանատարական անձնակազմի պատրաստման հյուսիսատլանտյան, մասնավորապես` կանադական փորձին:

Արցախյան շարժումը ծնեց անկախություն, իսկ անկախության ամենամեծ ձեռքբերումներից է մեր ազգային բանակը, որը, հիմնվելով երկրապահ ջոկատների վրա, ազատագրեց Արցախը, պաշտպանեց մեր հայրենիքի սահմանները բոլոր կողմերում, և այսօր էլ հայ զինվորն աներեր կանգնած է սահմանին և պաշտպանում է հող հայրենին: Այդ է վկայում վերջին օրերին կատարված սխրանքը սահմանում, այդ են վկայում անցած տարիների փորձությունները, երբ թշնամին հատուկ ջոկատներ էր ուղարկում՝ փորձելով ճեղքել մեր պաշտպանական գիծը, ահաբեկչական գործողություններ իրականացնել, սակայն միշտ եւ ամենուր հանդիպել է դիմակայության, ետ շպրտվել՝ տալով թե՛ մարդկային, թե՛ նյութական կորուստներ: Հայ զինվորի օրինակելի կերպարներ դարձան հավերժի ճամփորդ, կրտսեր սերժանտ Արմեն Հովհաննիսյանը, որը հերոսաբար զոհվեց, և նրա զինակից 8 ընկերները, որոնք արիաբար դիմակայեցին հակառակորդի երեք տասնյակ հատուկ պատրաստված ահաբեկիչներին եւ արժանի հակահարված հասցրին:

Օրերս Մալաթիա-Սեբաստիա համայնքի թիվ 105 ավագ դպրոցում կազմակերպվեց Հայոց բանակի 22-րդ տարեդարձին նվիրված հանդիսավոր միջոցառում, որի առանձնահատկությունը գիտագործնական լինելն էր։ Դպրոցի զինղեկ, փոխգնդապետ Հրաչիկ Հակոբյանը ելույթ ունեցավ զեկույցով, որից հետո ելույթներով հանդես եկան 11-րդ դասարանի աշակերտներ Արամ Վարդանյանը, Մերի Հալաջյանը, Քրիստինե Հանոյանը, Վարուժան Բաղդասարյանը։ Հրավիրված փ/գ-տ Վրեժ Սամվելյանը, համայնքի մշակույթի և սպորտի բաժնի ավ. մասնագետ, […]