ԲԱՐԵՓՈԽՈՒՄՆԵՐԸ ՇԱՐՈՒՆԱԿՎՈՒՄ ԵՆ

Զինված ուժերում մեկնարկել են մի շարք բարեփոխումներ, որոնց նպատակը որակապես նոր բանակ ունենալու գաղափարն է՝ բարձրացնել զինվորական ծառայության գրավչությունը՝ ամուր հիմք ստեղծելով արհեստավարժ բանակի համար:

2022-ը սկսվեց, շարունակվեց ու ավարտվեց զինված ուժերի արդիականացմանն ուղղված մի շարք նախաձեռնությունների քննարկմամբ ու ներդրմամբ: Նման առաջնահերթ ծրագրերից է «Պաշտպան հայրենյացը»:

Պայմանագրային զինվորական ծառայության անցման այս համակարգն արդեն գործողության մեջ է՝ սոցիալական արտոնությունների շոշափելի փաթեթով:

– Ինձ համար պատիվ է ծառայել իմ երկրի զինված ուժերում: Կարծում եմ, որ բոլորս մեր ներդրումը պետք է ունենանք բանակի հզորացման ու Հայրենիքի շենացման գործում: Ծրագիրը մեծ հնարավորություններ է տալիս,- ասում է ժամկետային զինծառայող Գրիշան:

-«Պաշտպան հայրենյաց» ծրագրով կես տարի ծառայելուց հետո կարող ես անցնել զինվորական պայմանագրային ծառայության: Համոզված եմ՝ այն անպայման կնպաստի մեր բանակի հզորացմանը: Պատիվ ունեմ ծառայելու Հայաստանի Հանրապետությանը, պաշտպանելու իմ երկիրը,- ընկերոջը միանում է Էդմոնը:

-Երբ լսեցի ծրագրի մասին, հետաքրքրվեցի և ցանկացա մասնակցել: Ոգևորված եմ, պետք է լավ ծառայեմ, առաջադրված խնդիրները գերազանց կատարեմ, որ կարողանամ ընդգրկվել ծրագրում,- ասում է Արթուրը: Իսկ նրա ընկեր Հովհաննեսն ավելացնում է.

-«Պաշտպան հայրենյաց» ծրագիրը հեռանկարային լավ հնարավորություն է:

Ծրագրի հաջող մեկնարկի մասին է փաստում ոչ միայն հայրենյաց պաշտպանների զինվորական լավ մասնագետ դառնալու, պատվով ծառայելու պատրաստակամությունը, այլև ծրագրի շահառուների մեծ թիվը, որն ի դեպ մրցակցային խթան կդառնա լավագույն կադրերի ընտրության հարցում:

ՀՈՎՀԱՆՆԵՍ ՊԱՌԱՇՅԱՆ